كلنا فاسدون مجتمعيا لا أستثني أحدا

هناك مقولة للفنان أحمد زكي ربنا يرحمه كلنا عارفينها اللي هي "كلنا فاسود لا استثني احدا" .. في كل مره بسمع الجملة دي لازم اقف وافكر فيها شويه واقعد اتخيل في ان معقول كلنا فاسدون .. هل فعلا في حد مش فاسد ؟

ولو فعلا في حد مش فاسد ممكن يفضل محافظ علي دا وسط ناس فاسدة؟

الحقيقه اني كل مره بفكر في الجمله دي ببقي نفسي اصدق و الاقي دليل ان مش كلنا فسده .. في محاولة مني للهروب من فكرة ان كلنا فاسدون .. او انك عايش في مجتمع فاسد .. ثقافته فاسده ..

كلنا اتعرضنا لمواقف مسممة جعلت الفساد موجود فينا، اللي صاحبه حكاله عن موقف عمله مع بنت وحكي عنه بمنتهي الفخر في أنه ازاي اذاها او زلها او خلي الناس تبصلها بنظره احتقار وصاحبه انبهر ب قد ايه انت جامد الشخص اللي بيسمع الموقف دا اتسمم والشخص اللي قاعد بيسمعهم وساكت اتسمم والشخص اللي لما جه يتدخل ويقوله ازاي تعمل كدا وحد قالو يا عم ملناش دعوه اتسمم .. كلهم اتسممو بالفساد

نظرة العنصريه لاي حد شكله غريب عنك سواء في لبسه او شكله الي ربنا خلقه بيه او ديانته نظرة فاسده بنتشر ثقافه فاسده في نفوس الناس ..

الكلام المحبط والسلبي اللي بيبقي من وجهة نظرك الخفيه جواك ان انا كدا روش لما حد يقولي انا نفسي اركب العربيه الفلانيه او نفسي يبقي عندي الشركه اللي بحلم بيها او ادخل الكليه اللي نفسي فيها .. وتقوم قايلو يا عم احلم علي قدك ولا كدا كدا هنتقابل في تجاره كلية الشعب "مع احترامي لاي حد بيدرس تجاره" .. ليه ! .. حتي لو الكلام بهزار بيسمم اللي قدامك وبتفسد حاجه جواه ممكن تبقي هي دي الحاجه اللي تخليه يحقق ذاته وتفتخر بيه وتقول فلان صاحبي .. شجعو يا عم حتي لو كان حلمه صغير او تافه بالنسبالك.

انا حتي عندي كلام كتير اوي عن مواقف شخصيه انا اتعرضت ليها افسدت حاجات كتير جوايا من زمان مرورا بالطفوله من اول المدرس اللي بيضرب بالعصايه لمجرد ان هو مخنوق من حياته اللي بشكل ما كان في ناس تانيه افسدت جواه حاجات خليته يدخل الفصل علي طالب بفتح عينه علي الدنيا ويفسد احساسه بانه عنده كرامه وعزة نفس وشجاعة.

والقليل اللي بينجي من الفساد دا هو اللي بيبقي عارف قيمته كويس وعارف نفسه وعاوز يبقي احسن فبيبدأ يعالج نفسو بنفسه في محاولات بتفضل لسنين عشان يعالج سوء التربيه والعقد اللي اتزرعت فيه من صغره زي الخوف والتردد والكسوف والضعف الاجتماعي والتواصادل مع الناس .. واللي بالمناسبه كل الحاجات دي حاجات فاسده اتزرعت فينا بشكل غير مباشر من ناس كان متعمده تفسد نفسيتنا وناس مكنش عندها وعي انه كدا بيفسد نفسية طفل لسه بيحاول يستوعب العالم حواليه ... لان باختصار شديد مفيش طفل بيتولد بيخاف ولا بيتكسف ولا بيتردد ولا مبيكنش عارف يتواصل مع العالم اللي حواليه ..