شهدت محاكم الأسرة هذا الأسبوع، العديد من قضايا الخلع، باختلاف الأسباب والدوافع، أبطال هذه القصص أشخاص عاديون ولكن كتب لهم القدر أن تكتب أسماؤهم فى سجلات القضاء.
وترصد 'أهل مصر' بعض قضايا الخلع خلال هذا الأسبوع.
رقية: ضربنى وأنا فى الرابع والجنين مات وإيدى اتكسرت
' من أول ما اتجوزته وهو مش بيتعامل معايا غير بالضرب، إيده سابقة لسانه كان معيشنى فى رعب بخاف اتكلم أو أنسي أجهز حاجة من طلباته، عشان ميضربنيش لأنى ضربه غبي وبيسيب كدمات فى وشي وجسمى، لكن على الرغم من كدا وأنا بعمل كل حاجة بيحتاجها إلا إنه بيتحجج على ايه ويضربنى ويقول لى الست مش بتخاف غير بالضرب عشان متعملش حاجة غلط، لحد آخر مرة ضربنى فيها كنت حامل فى الرابع ودا لأنى طلبت منه أروح عند دكتور كويس بدل العيادات الصحية، لحد ما موت ابنى منه لله'.. كلمات موجعة نطقت بها رقية وهى داخل محكمة الأسرة لرفع دعوى خلع من زوجها بعد 9 شهور من الزواج مبررة استحالة العشرة معه.
سماح: "اتجوز عليا عشان جسمى تخن شوية"
'اختارنى بإرداته لما اتقدم لي، ومحدش غصبه عليا، وطبيعى إنى لما أحمل وأخلف جسمى يزيد شوية لكن هو متقبلش دا وكان شايف إنى بعمل رجيم عشان خاطره، وراح عرف عليا واحدة مطلقة وقرر يتجوزها عليا، وعايزنى أعيش معاه ورافض يطلقني'.. جاءت هذه الكلمات على لسان 'سماح' وهى داخل محكمة الأسرة لرفع دعوى خلع من زوجها بعد ٤ سنوات من الزواج مبررة استحالة العشرة معه.
أحلام: عايزنى أدفع ثمن أكلي وباقي المرتب أعطيه لأمه
لم تتخيل أحلام أن زوجها الذى تقدم إليها تزوجها من أجل راتبها فقط، وليس حبا فيها حيث طلب منها بعد الزواج بشهرين أن تشارك بمرتبها فى مصاريف البيت، وظنت أنها ستشارك بجزء قليل ولكن بمرور الشهور وقبل عام من الزواج واجهها بالحقيقة وطلب منها أن تدفع النصف فى مصروفات البيت حساب طعامها والباقى تعطيه لحماتها لكى تدخره معها مما جعلها تقف داخل محكمة الأسرة لرفع دعوى خلع من زوجها بعد عام واحد فقط من الزواج مبررة استحالة العشرة معه.
رحاب: ضربني عشان اتأخرت 5 دقايق وأنا بحضر الفطار
'طلب مني أحضر فطار وكان ابنى بيبكى فاتأخرت خمس دقايق مش أكتر على الفطار، اتفأجت بيه بيضربنى لحد ما جسمى اتكسر من كتر الضرب دا غير الإهانة والذل وبعد معاناة الجيران قدروا يطلعوني من تحت ايده وسبت ليه البيت بعد ما ابنى اتعور وهو بيضربنى'، نطقت رحاب بهذه الكلمات وهي داخل محكمة الأسرة لرفع دعوى خلع من زوجها بعد عام ونصف من الزواج؛ مبررة بتلك المعاملة استحالة العشرة معه بعد التعدى عليها بالضرب المبرح.
سحر: عاوز أبويا يصرف عليه
'من كتر طمعه فيا وفى أهلي بقي يتجرأ ويطلب منى أتكلم مع أهلى يبعتوا لي فلوس، وكنت برفض عشان مكنتش بقدر أطلب منهم حاجة، لحد ما اتفاجئت إنه بيطلب منى أشترط على أهلي إنهم يملوا الثلاجة كل شهر أكل ولحمة وبيجبرنى أطلب من والدى لدرجة إنه خاصمنى شهرين لما رفضت'.. نطقت بهذه الكلمات سحر وهى داخل محكمة الأسرة؛ لرفع دعوى خلع من زوجها بعد 8 أشهر من الزواج؛ مبررة استحالة العشرة معه.
تابعوا آخر أهل مصر على Google News
