وجه الإعلامي أحمد شوبير حارس مرمى الأهلي ومنتخب مصر السابق، هجوما شديد اللهجة ضد أحمد مجاهد رئيس اللجنة المكلفة بإدارة اتحاد الكرة مطالباً إياه بإعلان من يدير الجبلاية في الوقت الحالي.
وقال شوبير في برنامجه الإذاعي عبر أون سبورت إف إم، "كل خطط الاتحاد الأحادي باظت بعد اجتماع الأندية، اتحاد الكرة عامل زي عنتر في الاسكتش الشهير اوعى يجيلك عنتر، عايز يولع روما بحالها، شوية يقول هنلغي الفار ولما الأندية اعترضت قال خلاص هو أنتم زعلتم مش هنلغيه، هنعمل رابطة للأندية ورجع قال لأ خلاص مفيش رابطة وده مش تراجع محدش يقول علينا بنتراجع".
وأضاف شوبير: "بيقول إنى داخل معاك معركة شخصية وأنا بقوله معنديش معركة شخصية معاك ولا مع غيرك ولا مع كبيرك لأنك لا تستحق معركة شخصية من الأساس، أنا هفضل أسأل من يدير الكرة في مصر، طول عمرنا عارفين إن الكرة تدار من خلال لجان المسابقات والحكام وشئون اللاعبين وكل ده مشيته، لازم نعرف من يدير الجبلاية ، بقولها بحرقة مينفعش اتحاد كرة يديره فرد واحد".
وأشار شوبير، "لو متخانق مع عمرو الجنايني اضربوا بعض في الشارع لكن بعيدا عن الجبلاية مش كل قرار خده الجنايني تمسحه بأستيكة، كنت أول من انتقد اللجنة الخماسية في بداية عملها، لكن تغير موقفي بعد ماشوفت انجازاتهم لكن مينفعش اتحاد الكرة يخدم على بني آدم واحد عشان يبقى رئيس اتحاد الكرة".
وواصل شوبير هجومه: "فين أدوار أعضاء المجلس زملائك وفين رؤساء اللجان، داخلين على فترة انتقالات شتوية ومفيش لجنة شئون اللاعبين، فين لجان القسم الثاني والثالث اللي طردتها بره بدون سبب".
واختتم شوبير تصريحاته قائلًا: "كوارث وبلاوي في الاتحاد وهفضل ازعق واصرخ في الراديو والتليفزيون، كفاية اني أقول إن في 8 مليون جنيه مستحقات للاتحاد لدى الكاف والجبلاية بتقول مفيش فلوس ندفع لشركة الفار".
تابعوا آخر أهل مصر على Google News
