بعد اعتزاله.. صلاح أمين: «أديت مهمتي وعمري ما كنت بتاع مشاكل»

كشف صلاح أمين، مدرب سموحة حاليًا، كواليس اتخاذه لقرار الاعتزال، في الوقت الحالي.

وكتب أمين عبر حسابه الشخصى على إنستجرام: 'قرار الاعتزال، مشوار طويل جدًا وسنين لعب كتيرة جدًا، لبست تيشرتات أندية كتير وتشرفت باللعب تحت قيادة مدربين محترمين وزاملت لعيبة محترمة كتير، لكن أكيد مهما طال عُمر لاعب الكورة هيجي وقت ولازم يعتزل، هيجي وقت وهيبقي مسئول لكن مش جوة الملعب'.

وأضاف: 'الوقت ده جه دلوقتي، قررت أعتزل وحاسس إني أديت مهمتي كلاعب كرة قدم علي أكمل وجه، عمري ما كنت بتاع مشاكل ولا عمري أذيت لاعب، كنت دايمًا بحب الخير لزمايلي المهاجمين قبل المدافعين'.

وواصل: 'عايز أشكر كل نادي تواجدت فيه وتشرفت باللعب فيه، عايز أشكر كل لاعب زاملته، عايز أشكر كل لاعب كان منافس ليا في الفرق الأخرى، عايز أشكر كل إعلامي اتكلم عليا سواء انتقدني أو مدحني، وطبعًا بشكر كل جماهير مصر إللي كانت خير دعم وسند وكنت بشوف مظاهر الحب في كلامهم ونظراتهم بالرغم من إني ملعبتش أهلي وزمالك'.

واختتم: 'في النهاية تركت الملعب كلاعب ودلوقتي بقيت مدرب وإن شاء الله أقدر أعمل حاجة كويسة في اللي جاي.. ادعولي'.

وبدأ صلاح أمين مسيرته الاحترافية فى عالم كرة القدم بموسم 2005-2006، ضمن صفوف فريق القناة، قبل أن ينتقل فى الموسم التالى إلى صفوف الإسماعيلى ولكنه لم يلعب معهم سوى مباراة وحيدة، لينتقل بعدها إلى صفوف الداخلية.