لم تتخيل صاحبة الـ20 عامًا أن زوجها وشريك حياتها سوف يكون سببًا في تعاستها، وأن فضيحتها ستكون على يديه، بعدما أرسل صورها الخاصة لأصدقائه انتقامًا منها لرفعها دعوى خلع.
روت الزوجة 'مريم.ع'، مأساتها مع 'أحمد.م '، والتي بدأت بزواجهما بعد قصة حب طويلة دامت لسنوات، قائلة: 'حاله اتغير بعد الجواز 180 درجة قعد في البيت من غير شغل ولما اشتكيت من قلة المصاريف، بدأ يعاملني أسوأ معاملة من ضرب وشتيمة'.
وتابعت 'فضلت مستحملة لحد ما فاض بيا وطلبت منه الطلاق قام ضربني أنا وبنتي لحد ما تسبب في كسر مناخيري وعملي إصابات في فخدي الأيمن بسبب أنه كسر عليا أباجورة الأوضة'.
وأضافت 'مريم': 'بعد سنوات الإهانة والضرب قررت أسيب البيت من شهر 7 اللي فات وروحت قعدت عند أهلي لأنه يستحيل معاشرته بكل الطرق سواء كان بسبب عدم نظافته الشخصية ودا بشهادة أهله أو معاملته السيئة معايا، ومن وقتها وهو مصرفش عليا ولا على بنته جنيه'.
وأكملت 'بنتي كانت بتموت وهو ميعرفش عنها حاجة ولما اتصلت بزميلته في الشغل عشان يرد عليا و يجي يودي بنته لدكتور اتصل بماما وشتمها وقالها هيجي يضربنى وأنا مسجلة المكالمة، بعدها روحت محكمة الأسرة ورفعت عليه قضية خلع ومن هنا بدأ يبتزني ويهددني بأنه هينزل صوري على النت، طلبت من الناس تعمل ريبورتات كتير لصفحته على الفيسبوك لحد ما اتقفلت'.
واستكملت: 'بعدها اتفاجئت بأنه عمل أكونت فيك باسم مها كامل وبعت صوري بقمصان النوم لأصحابي كلهم وديه صور كنت ببعتهاله كنوع من تغيير الروتين لأنه كان زوجي وأبو بنتي وبتعامل معاه بثقة، لكن هو اتخلى عن رجولته وعمل كدة في أم بنته، روحت عملت فيه محضر وأرفقته بكل الصور والإسكرينات اللي بعتها لصحابي'.
واختتمت مريم: 'أنا عايزة حقي يرجع وصوتي يوصل للنائب العام محتاجة كل الناس تقف جمبي، أنا مسرقتش إيميله زي ما هو كاتب أنا قفلته بكثرة الريبورتات عليه لأنه كان بيشتمني ويبتزني عليه'.
تابعوا آخر أهل مصر على Google News
