نهى من داخل محكمة الأسرة: "بيخوني مع صحبتي المطلقة"

'خاني مع أقرب الناس ليا اللي فتحت لها بيتى واعتبرتها صديقة عمري، لكن خدعتني هي وجوزي واتجوز عرفي في شقة مفروشة، لكن ربنا كشف سترهم، وشوفتهم مع بعض والغريب انهم مش مكسوفين من اللى حصل وبيجبرونى على تقبل الأمر الواقع، وكأنه شئ عادي، وجوزى يقول لى أنا 'أنا حابب أعيش معاكم انتوا الأثنين' نطقت بهذه الكلمات نهى وهى داخل محكمة الأسرة لرفع دعوى خلع من زوجها مبررة استحالة العيش معه، بعد أن تزوج عليها عرفيا من أعز صديقاتها.

زواج ٤ سنوات

وروت الزوجة قصتها لـ'أهل مصر'، أنها تزوجت منذ 4 أعوام زواج بعد علاقة عاطفية استمرت أكثر من 9 شهور، وكانت تشعر بالراحة الشديدة معه قائلة: 'اتعرفت عليه عن طريق الشغل، وبدأت بينا علاقة عاطفية، وحسيت أنى اخترت الشخص المناسب، لكن اكتشفت انى كنت مخدوعة فيه، كانت لى صاحبة وعشرة عمر، وكنت بحبها اوى ودخلتها بيتى وعرفتها على جوزى، وكانت وقتها لسه مطلقة وخرجت من تجربة فاشلة، رفضت أسيبها وساندتها فى محنتها، لكن مكنتش أعرف أنها هتعض الايد اللى اتمدت ليها'.

رفع دعوى خلع

وتابعت حديثها: 'وكانت تزورنى فى شقتى، وجوزى فى البداية كان يعاملها زى اخته قدامى، لكن معرفش بعدها ايه اللى حصل غير انى فؤجت أنى حد من أهلى شافهم وهم داخلين شقة مفروشة، وروحت على العنوان، وانا بكذب نفسي وأقول استحالة يحصل، لكن لقيتهم فعلا مع بعض واعترفوا انهم متجوزين عرفي، وبيطلبوا منى أن ارضي بالوضع ونعيش مع بعض، لكن رفضت وأصريت على الطلاق ورفض، قررت ارفع دعوى خلع وفى انتظار الجلسة الأولى'.