حنان تطلب الخلع: "كل ما بشوف وشه بتخنق.. وأهلي السبب"

لم تستطع حنان مواصلة الحياة مع زوجها بعد عامين فقط من الزواج لتقرر الانفصال عنه وتقف داخل محكمة الأسرة لرفع دعوى دعوى خلع مبررة ذلك بقولها 'أهلى هم السبب في اللى انا فيه والإهانة اللى تحملتها من جوزى وألفاظه القذرة ليا، لأنهم أجبرونى على الجواز منه، رغم انى كنت معترضه ومش متقبلة حتى أبص له، وكان فى واحد تانى متقدم لى وكنت حاسة براحة ناحيته لكن هم رفضوه، وصمموا على رأيهم، ومحدش داق العذاب في النهاية غيرى'.

وروت الزوجة قصتها لـ'أهل مصر' موضحة أنها تزوجت منذ عامين زواج صالونات على الرغم من اعتراضها على الزواج منه ولكن لا مفر حيث أجبرها والداها على إتمام الزواج منه قائلة: 'من أول ما شوفته محستش براحة نفسية نهائي ورفضت ووافقت على واحد تانى جارى كان متقدم لى برضو، لكن أهلى رفضوا ووافقوا على الشخص الغلط عشان مستواه المادى أعلى، وتزوجت بعد ٤ شهور، ومن أول ما اتجوزنا وهو خناقات وألفاظ وحشة وسب ليا ولأهلى على أتفه الأسباب، غير انى لو أخدت منه فلوس يذلنى ويعايرنى بيها'.

وتابعت حديثها: 'وكمان خناقات الخلفة روحنا لأكتر من دكتور وأكد أنه عنده مشكلة محتاجة للعلاج، وهو ولا فى دماغه ولا بياخد علاج ولا أى حاجة، ولما اتخانق معه يقول لى أنا براحتى لما أفكر أخلف أبقي أتعالج، غير انه ضربنى أكتر من مرة قبل كدا، لحد ما بقيت أكره أبص فى وشه، وقررت انى أطلق لكن رفض لحد ما وصلنى أروح محكمة الأسرة لرفع دعوى خلع ومازالت الدعوى منظورة أمام القضاء'.