"هدى" تطلب الخلع: "عايزني أشتغل وأصرف عليه وهو يقعد في البيت"

لم تتخيل "هدى"، أن زوجها سيأتي عليه يوم ويترك عمله بحجة أنه متعب ولا يستطيع العمل ليطلب منها الاستمرار في العمل، ويجلس هو في المنزل ليتحمل تربية الأبناء، ما جعلها تقف داخل محكمة الأسرة لرفع دعوى خلع من زوجها بعد 7 سنوات من الزواج مبررة ذلك بقولها:" كان بيشتغل نص الشهر والباقي تعبان وكنت بحاول معاه واضطريت أنزل اشتغل عشان أساعد معاه فى مصاريف البيت لكن هو رفض يشتغل تاني بعد ما ولدت توأم، وساب شغله والغريبة إنه بيقولي انزلي أنتى الشغل وأنا هقعد بالعيال فى البيت وكمان لما بقبض بياخد نص المرتب لمصاريفه الشخصية والباقي مش بيكفي مصاريف البيت ".

وروت "هدى" قصتها لـ "أهل مصر" قائلة: "أول ما اتجوزنا كان بيشتغل يوم ويوم لأ بحجة إنه دايما تعبان وكنت بستحمل وقررت إني أقف معاه وأساعده عشان الدنيا تمشي وخاصة إنه عامل باليومية، ونزلت اشتغلت في مصنع وساعدته وكانت الدنيا ماشية لحد ما ولدت طفلين توأم وقررت إني أقعد من الشغل عشان أعرف اخد بالي منهم، لكن لقيته بيرفض وعاوزني أشتغل واضطريت أودي العيال الحضانة وأكمل شغل، لحد ما بقى عايز نص المرتب لمصاريفه الشخصية، والباقي بقي مش مكفي حاجة".

وتابعت حديثها: "اتخانقت معاه عشان يتحمل المسؤولية لكن مافيش فايدة وعايز يقعد بالعيال في البيت، بدل مصاريف الحضانة ونزل من نظري جدا وقررت إني انفصل عنه وأربي ولادي أفضل ما أشتغل وأصرف عليه، وطلبت الطلاق ورفض، وقررت ارفع دعوى خلع ومازالت الدعوى منظورة أمام القضاء".