تقدمت هدى بدعوى قضائية أمام محكمة الأسرة لرفع دعوى خلع بعد عام واحد فقط من الزواج بسبب بخله الشديد معها ومع عائلتها مبررة استحالة العشرة معه قائلة 'من بخله رفض والدتي تقعد معايا في شقتي أسبوع عشان كنت تعبانة ومحتاجة حد يساعدنى، لكن هو اتخانق معايا، ووالدتى كانت عندى سامعه وهو بيقول لى أنا مش معايا فلوس عشان أستضيف أمك عندى اسبوع، ووالدتى زعلت ومشيت بسبب كلامه'.
قالت الزوجة في مستهل حديثها مع 'أهل مصر': 'اتجوزت من سنة جواز صالونات، كنت فى فترة الخطوبة بحس أنه بخيل، لأنه كان ممكن ييجى يزورنى من غير ما يجبب أى حاجة معاه، لكن كل الناس اللي حواليا تقول لي عادي ده عشان بيجهز نفسه مش أكثر من كده ولما تتجوزوا كل حاجة هتبقى ليكى وما فيش راجل بخيل مع مراته، كنت بصدق كلامهم وأقنعت نفسي بكده، لكن بعد الجواز اكتشفت ان البخل بيجرى فى دمه، بخيل في كل حاجة لدرجة أنه بيرفض يعزم حد عندنا حتى أهله، لكن هو يحب يروح يتعزم عادي، وكنت بحس بالإحراج من اللي حوالي لما أروح معاه أزور حد، لأنه يوم ما يشترى حاجة هو كيلو الفاكهة'.
وأضافت: 'كنت بحاول أغير منه لكن مافيش أى فايدة، لحد ما يوم تعبت جدا والدكتور كتب لى على راحة وطلبت من والدتى تيجى تعقد معايا كام يوم لحد ما اخف، مكنتش متوقعة انى جوزى ممكن يطرد أمى بالشكل دى لما رجع من الشغل وشاف أمى قولتله انى طلبت منها تقعد معايا كام يوم لحد ما أخف صدمنى بكلامه وهو بيقول وأنا مضطر اتحمل أكلها أسبوع كامل لا انا مش معايا فلوس لكدا'.
وتابعت: 'والدتى سمعته ومشيت وأنا كمان قررت أمشي وراها وهو قال لى لو مشيتى مترجعيش وطلاق مش هطلقك، هسيبك كدا، وفعلا قعدت شهر ومسألش فيا عشان كدا رفعت دعوى خلع بمحكمة الأسرة وأنتظر أولى الجلسات.
تابعوا آخر أهل مصر على Google News
