'كل حاجة فى شغل البيت لازم يدخل فيها، حتى المطبخ لازم يشوف إىه اللى اطبخ وايه اللى مش عاجبه، غير تعليقاته الكثيرة على الملح والتوابل، بحس انى متراقبة مش عارفة أطبخ أو أنضف الشقة بسبب تعليقاته أو تدخلاته، عايزة أحس أن البيت مملكتى، وكمان غير الإحراج اللى بكون فيه لما ييجى ضيوف مبيقعدش يقوم يشوف الأكل والتجهيزات، وطوال العقدة الكلام على الأكل والنضافة، وشيل الأكل من على السفرة لحد ما يخلى الناس تتريق عليه'.. كلمات غريبة نطقت بها منى وهى داخل محكمة الأسرة لرفع دعوى خلع من زوجها مبررة استحالة العشرة معه.
وروت الزوجة قصتها لـ'أهل مصر' قائلة: اتجوزت من 11 شهر زواج صالونات من شخص منكرش أنه محترم جدا، وأخلاقه كويسة ومش بخيل نهائيا معايا لكن المشكلة أنه ست بيت فى نفسه أوى، من يوم ما أتجوزنا وهو بيدخل فى كل حاجة من أكل لشرب حتى غسيل المواعين، نفسي أقف فى المطبخ لوحدى أجهز أكلى وجوزى يقول لى تسلم إيدك بس بدون أى تعليقات، لكن للأسف إما يطبخ هوالأكل اللى عايزه، أو يخلينى أطبخ أنا وهو فوق دماغى مع تعليقاته السخيفة واللى تسد النفس على الأكل.
وتابعت حديثها قائلة: كنت بعيط من كلامه كتير جدا، وخاصة لما ييجى ضيوف بحسه مش جوزى لا دا الشغال اللى فى البيت وهو بيحط الأكل ويشيل وكلامه كله على الأصناف وطريقة الأكل وكمان يحرجنى ويقول بحب أطبخ عشان مش بيعجبنى أكل منى، والناس يفضلوا يضحكوا وهو لا حياة لمن تنادى لحد ما طفح بي الكيل وطلبت منه أنه مالهوش دعوة بأى حاجة تخص الأكل والشرب أو النظافة لكن مافيش فايدة ولا أى نتيجة، قررت أرحم نفسي وأطلق لأنى فعلا مش حاسة أنى متجوزة راجل عشان كدا رفعت دعوى خلع، ومازالت الدعوى منظورة أمام القضاء.
تابعوا آخر أهل مصر على Google News
