تقدم ياسر بدعوى قضائية أمام محكمة الأسرة لرفع دعوى نشوز ضد زوجته بعد عام ونصف من الزواج مبررا ذلك بقوله "أول الجواز كانت عادى وخجولة ودا كان أكتر حاجة عجبانى فيها لكن بعد شهور قليلة ابتدت تظهر على حقيقتها وللأسف بتمشي وراء كلام أمها وصحباتها لدرجة انها قبل ما تحصل بيننا علاقة زوجية تطلب فلوس أو هدية لازم مقابل، كنت فاكر الأول انها مجرد هزار لكن لقيتها فعلا واخداها جد لدرجة انها بقت ترفض آخد حقي الشرعى منها من غير مقابل، وكأنها مش مراتى وكمان متمردة عليا وبقت تخرج من ورايا، وكل صحباتها مش مريحين نفسيا، ولما اتخانقت معاها عشان تبقى زى الأول غلطت فيا وفى أهلى".
وقال الزوج فى مستهل حديثه مع "أهل مصر": أنا شوفتها فى فرح قبل كدا، وحسيت انى معجب بيها، وعلى الرغم انى لما سألت عنها قبل الزواج كل الناس قالوا ان أمها صعبة وهى اللى بتمشي أبوها، لكن أنا قولت ماليش دعوة بأمها وأهم حاجة البنت شكلها هادية وطيبة وغير أمها، لكن كنت مخدوع للأسف اكتشفت انها بتمثل لحد ما اتجوزنا وبعدها بقت نسخة من أمها فى صوتها العالى وتصرفاتها الغير لائقة وتطلب فلوس وهدايا مقابل العلاقة الزوجية وتمنعنى عن حقي لو ما نفذتش اللى بتطلبه، كنت بسيبها لانى عمرى ما هستخدم الضرب أو الإجبار فى حاجة لانى اتربيت على كدا، لكن هى افتكرته ضعف وقللت منى وبقت تخرج من غير ما تقولى وتصاحب بنات شكلهم مش تمام ولبسهم عريان.
وتابع حديثه: بدأت الخناقات تزيد بيننا عشان تتغير ومافيش أى نتيجة لحد ما بقيت بكره أبص فى وشها وكانت بتاخد حبوب منع الحمل عشان متخلفش دلوقتى، وبتهددنى بقائمة المنقولات الزوجية لأنى كنت غبي وكنت كاتب مبلغ كبير وأنا اللى جايب كل حاجة فى الشقة، لحد ما جات فى يوم رجعت متأخرة من بره وكل ما ارن عليها متردش، عشان كدا قررت بعد تفكير طويل انى أرفع عليها دعوى نشوز ومازالت الدعوى منظورة أمام القضاء.
تابعوا آخر أهل مصر على Google News
