"عمرى ما كنت أتخيل أن جوزى بالشكل دا، مادى بشكل مش طبيعي، لدرجة أنه بيستنى زيارات أهلى عشان يشوف هم جابوا ايه، ويتريق عليهم ويفضل يطلب منهم حاجات غالية لدرجة أنه طلب من والدى يشترى له عربية، فوالدى قاله سيبنى أفكر، وهو حس فعلا أن والدى مش هيجيبله، فاتلكك على خزين رمضان اللى جبوه ورجعه ليهم، ولما اتكلمت ضربنى".. جاءت هذه الكلمات على لسان وفاء وهى داخل محكمة الأسرة لرفع دعوى خلع من زوجها بعد 11 شهرا من الزواج مبررة استحالة العشرة معه.
وقالت الزوجة في مستهل حديثها مع "أهل مصر": الحمدلله من عائلة محترمة ومستوى مادى كويس نتيجة لتعب والدى فى تكوين مستقبله عشان كدا بيعرف يصرف الفلوس فى المكان صح، وعشان كدا جوزى مستحملش لما عرف ان والدى استحالة يديله مليم واحد، جوزى لما عرفنى فى البداية رسم عليا الحب والمشاعر وأنا صدقته، لحد ما اتجوزنا وهو طول الوقت عايز والدى يصرف عليه او يجبله هدايا، وعشان والدى حاسس انه شخص طماع ومش كويس، كان بيصده بكل حاجة".
وتابعت: "والدى كان بيجيب اللي المفروض يتجاب لبنته من خزين وخلافه، لكن جوزى الطمع كان مالى دماغه، لدرجة أنه وصل يطلب منى أقول لوالدى يشترى لينا عربية، وعشان أتجنب الخلافات قولت لوالدى واتهرب منى فى الكلام ، وفهمت أنه رافض وقولت لجوزى اللى الحقد ملى قلبه وليل نهار معيشنا فى النكد لحد ما لقى فرصة عشان ينتقم منى وفعلا اهلى جابوا خزين رمضان وعمل خناقة كبيرة، ازاى يجيبوا حاجات قليلة المفروض كانوا ادوكى فلوس، واتخنقنا وضربنى وروحت بيت أهلى ورفعت عليه دعوى خلع ومازالت الدعوى منظورة أمام القضاء".
تابعوا آخر أهل مصر على Google News
