"كان نفسي أحس إني متجوزة راجل يعرف يحميني مش ضل راجل ماشي وراء كلام أمه وأخوه الكبير، بيخاف يأخد قرار قبل ما يرجعهم عشان ميعلوش صوتهم عليه، وطبعا كان منظر جوزي قدامي مش كويس لما ألاقي أخوه أو أمه بيتكلموا معاه بالأوامر فقط، لدرجة إنهم بيندهوا عليه بكلمة حمار وهو يقول نعم وحاضر لحد ما قل أو أختفي أساسا من نظري"، نطقت بهذه الكلمات حنان وهى داخل محكمة الأسرة لرفع دعوى خلع من زوجها؛ بعد عام فقط من الزواج مبررة استحالة العشرة معه.
وروت الزوجة مأساتها لـ"أهل مصر": "أنا لما اتقدم ليا جوزي مكنتش أعرفه قبل كدا وحتى لما جه البيت عندنا كان هادئ جدا ومش بيتكلم كتير، وافتكرت إنه راجل أخلاق وهيقدر يتعامل معايا بطريقة كويسة، ووافقت على طول لكن للأسف تخمينى كان غلط والحقيقة أنه هادئ عشان إنسان مالوش رأى ولا يعرف يأخد قرار فى حياته، القرارات كلها فى ايد أخوه وأمه حتى لو عايزه أخرج أو أزور أهلي، لازم يقولهم وهم اللى يحددوا اليوم والساعة اللي أروح فيها، فى حين إنى أشوف زوجة أخوه واخده حقها وزيادة وجوزها عاملها ستنا كلنا".
وتابعت: "بقت حياتى حجيم بسبب أهله وضعف شخصيته، واضطريت إني أتكلم مع جوزى عشان يغير من نفسه، وحاولت أفهمه إنى من حقي اشوف جوزى راجل قدامى وليه كلمة، واستخدمت كل وسائل الإقناع عشان يتغير مافيش فايدة، وكمان راح قال لأمه وأخوه كل كلامى وطبعا دى كانت فرصتهم وحاولوا يتعدوا عليا بالضرب لكن الحمدلله عرفت أطلع من تحت ايديهم وسبت ليهم الدنيا كلها، وقررت انفصل عنه".
وأكملت الزوجة، فكرت إني أكسر نفسه زى ما كسر نفسي وفأجته برفع دعوى خلع عشان يعرف يتعامل ازاى معانا، ومازالت الدعوى منظورة أمام القضاء".
تابعوا آخر أهل مصر على Google News
