"3 سنين مستحملة كل ظروفه ومش راضية اتطلق منه على الرغم إنه عنده مشاكل تمنعه من الخلفة ومحتاج وقت وعلاج، عشان مكسرش بخاطره ولا أزعله، على الرغم إنى مش مرتاحة معاه فى حياتنا الزوجية، لكن كنت بقول لنفسي اتحملى، لكن فى النهاية يكون جزاتي إنه يخونى مع واحدة ويعمل معاها علاقة فى بيتها".. نطقت بهذه الكلمات "إيمان" وهى داخل محكمة الأسرة لرفع دعوى خلع من زوجها بعد 3 سنوات من الزواج مبررة استحالة العشرة معه.
وقالت الزوجة في مستهل حديثها لـ"أهل مصر"، "طول عمرى بظلم نفسي عشان خاطر غيري، حتى فى قرار جوازى أول ما اتقدم ليا محستش براحة نفسية، لكن لقيت أهلى فرحانين بالعريس وبيشكروا فيه ومحاولات أمى عشان أوافق عليه وتفرح بيا، اضطريت إنى أوافق عشان أخلى الكل يفرح ومش مهم أنا، وحاولت في فترة الخطوبة وبداية الجواز إنى اقرب منه وتقبلته كزوج الحمدلله كانت الأيام بتمر زى أى بيت أيام كويسين ومرات في مشاكل بيننا وتتحل وأجى على نفسي فيها، لحد ما ربنا أراد إننا نتأخر فى الحمل وأهله أصروا إننا نكشف، واتضح إنه عنده مشكلة في الخلفة ومحتاج وقت في العلاج، وقررت إنى هكمل معاه عشان مكسروش.
وتابعت: "على الرغم إنى كنت مش مرتاحة معاه ولا مع أهله لكن متعودتش إنى أجرح حد، وكنت بأقلم نفسي وأي مشكله اغلط فيها نفسي عشان خاطره لكن هو مقدرش أي حاجة من دا كله، وعايش حياته ومقضيها وعرفت لما وقعت فى ايدى رسايل بينه وبين واحدة مطلقة وحصلت بينهم علاقة فى الحرام داخل بيتها، ولما واجهته بيعتذر ويطلب منى إنى أسامحه، لكن مقدرتش ولما رفض يطلقنى رفعت عليه دعوى خلع ومازالت الدعوى منظورة أمام القضاء.
تابعوا آخر أهل مصر على Google News
