"اقترح عليا أننا نسافر لدولة عربية عشان نكون مستقبلنا ونشتغل أحنا الاتنين بعد الجواز على طول ونأجل موضوع الخلفة لحد ما نرجع مصر، وعشان كنت بحبه وفاكره أنى جوزى سندى وهو اللى يحمينى من أى حد وافقت على طول وسافرت معاه ووافقت أنزل اشتغل أى حاجة عشان الفلوس، لكن اكتشفت أنه عايزنى أقابل رجالة عرب عشان شغله وعرفت أنه جابنى معاه عشان يشغلنى ويبيع شرفي مقابل الفلوس".. نطقت بهذه الكلمات صفاء وهى داخل محكمة الأسرة لرفع دعوى خلع من زوجها بعد مرور 9 شهور من الزواج مبررة استحالة العشرة معه.
وروت الزوجة قصتها لـ "أهل مصر": "بعد ما خلصت الجامعة اتعرفت على شاب بيشتغل فى شركة قطاع خاص وبدأ الإعجاب بيننا، واتعلقت بيه جدا ورفضت أكتر من عريس بسببه لحد ما يتقدم ليا هو وخاصة أنى على قدر عالى من الجمال بشهادة الكل، واتقدم ليا واتفق على الجواز وأننا نسافر على طول عشان هو فى شغل جاله فى بلد عربية ومحتاجنى معاه وهيشوف شغل ليا، والدى كان معترض فى الأول وخاصة أنى أهله من محافظة تانية ومنعرفش اصلهم وأنا اللى اصريت على الجواز منه، وفعلا جهزنا ورقنا بعد 4 شهور من الجواز وسافرت معاه وأنا فى قمة سعادتى ومش عارفة اللى هيحصل ليا هناك".
وتابعت حديثها: "وسافرنا هناك ولقيت شغل لكن بعد أيام لقيت جوزى اتغير معايا مش بيسالنى حتى لو أتاتخرت بره كنت فين، أهم حاجة اجيب فلوس وهو يخدها بحجة انه هيشيل لمستقبلنا ونأجل موضوع الخلفة كام سنة، وكنت صابرة معاه لكن اتفاجئت أنه بقي يعزم رجالة عرب فى البيت وعايزنى أقعد معاهم أو اخرج معاهم فى فندق عشان مصالح بينهم وفلوس ، واكتشفت أنى كنت غبية وهو استغل جمالى عشان يبيعني مقابل الفلوس، وخوفت يعمل ليا حاجة فى الغربة لما أواجهه، واتحججت أنى والدى تعبان وهنزل أسبوع اشوفه وأرجع، ورجعت مصر ورفعت عليه دعوى خلع ومنتظرة أولى الجلسات".
تابعوا آخر أهل مصر على Google News
