"من أول ما اتجوزت وأنا مش مرتاحة لعلاقته بزوجة أخوه؛ يطلع الشقة عندها بحجة أنه بيصلح لها حاجة، ومبيستحملش حد يغلط فيها أو يتخانق معاها وعلى العكس بيسيب الكل يعاملنى معاملة جافة؛ ولما اتكلم معاه يقول لى دى مراة أخويا واحنا بنعزها عشان كويسة؛ واكتشفت انه بيتكلم معاها على النت فى نص الليل ولما قولت قدامهم فى البيت حماتى ضربتنى؛ وسمعت إهانه من كل اللى فى البيت".. نطقت بهذه الكلمات منال وهى داخل محكمة الأسرة لرفع دعوى خلع من زوجها بعد عام و9 شهور من الزواج مبررة استحالة العشرة معه.
وقالت الزوجة في مستهل حديثها مع "أهل مصر": "اتجوزت من سنة و9 شهور جواز صالونات؛ وكان شرط جوزى اننا نعيش فى بيت أهله مع أخوه ومراته وحماتى؛ ومن فترة الخطوبة وأنا حاسة انه بيدخل مراة أخوه فى كل حاجة حتى فرحنا أو تكاليف القاعة واختيارها، وكنت ببرر دا أنهم بيعتبروها أختهم ومش مشكلة وكنت بعدى عشان مفكرش فى أى حاجة مش كويسة؛ لكن لما اتجوزنا وبقيت عايشة معاهم فى نفس البيت لاحظت علاقتهم اللى استحالة حد يقبل بيها، أول ما يدخل جوزى من بره لازم يسأل عليها؛ هو اللى بيروح يشترى ليها طلباتها بحجة أن جوزها مشغول فى الشغل حتى ابنها مش بيفارق حضنه؛ ومبيستحملش حد يزعلها قدامه حتى لو حماتى أو أنا.
وتابعت حديثها قائلة؛ كنت بموت من الغيرة والعلاقة المريبة بينهم؛ والغريب أن كل البيت ساكت وشايف ان الموضوع عادى؛ حتى جوزها لحد ما اكتشفت انه بيكلمها فى نص الليل يسألها عن كل حاجة حصلت معاها طول اليوم على الرغم أنه مش بيسال عنى أصلا، ولما اتكلمت معاه يقول لى كفاية صداع الشغل؛ ولما شوفت الرسايل بينهم قررت أفضحهم قدام حماتى والبيت كله لكن اتفاجئت بحماتى بتضربنى؛ وبتتهمنى ان أخلاقي مش كويسة عشان بفكر فى الغلط؛ وقررت انى أسيب لهم البيت وطلبت الطلاق ورفض يطلقنى لما عرف انى هطلب منه قائمة المنقولات الزوجية، فرفعت عليه دعوى خلع ومنتظرة أولى الجلسات.
تابعوا آخر أهل مصر على Google News
