"أهم حاجة عنده أنه يستلف فلوس من الناس، وميرجعش حاجة لحد ما الكل بقى يتهرب منه ويرفض يسلفه أي فلوس، بسبب أنه بيشرب حشيش ومش بيشتغل غير يوم وعشرة لأ، ومستحملة وأقول بكرة هيتغير لحد ما في يوم قرر يعمل مشروع خاص وطلب فلوس من صاحبه بعد ما ربنا تاب عليه، وقل شرب حشيش، لكن صاحبه رفض واتفأجت أن جوزي طالب مني أمضي أنا على إيصالات أمانة بالمبلغ اللي هياخده"، جاءت هذه الكلمات على لسان إيمان من داخل محكمة الأسرة لرفع دعوى خلع من زوجها بعد مشاجرة معه مبررة استحالة العيش معه.
وقالت الزوجة لـ "أهل مصر": "اتجوزت من 5 سنوات جواز صالونات بعد وفاة والدتي وكنت بتمنى أعيش حياة مستقرة وأسرة وبيت، خاصة أن إخواتي كلهم متجوزين وكل واحد له بيته وحياته، لكن نصيبي طلع مش كويس مع شخص اتفأجت أنه بيشرب حشيش مش بيتحمل مسئوولية أي حاجة، حياته كلها شرب ونوم وسلف ودين من كل الناس لحد ما بقت الناس تتهرب منه عشان ميأخدش منها فلوس لأنه مش بيرد حاجة ووقفت جنبه وأكتر من مرة راح مصحة واتعالج ورجع تاني وبعدين لما ربنا كرمنا بطفل قلل الشرب شوية".
وتابعت إيمان: "كلمني أنه عايز يفتح مشروع ومش معاه رأسمال عرضت عليه أنه يركز في شغل في أي مكان لحد ما نجمع مبلغ ونفكر في المشروع لكن هو رفض وصمم أنه يبدأ في المشروع وكلم أصحابه عشان يأخد منهم فلوس لكن صاحبه اللي وافق أنه يديله فلوس شرط عليه أن أنا اللي أمضي على إيصالات الأمانة، والغريب أن جوزي وافق وبيحاول يقنعنى أني أوافق، ولما رفضت بقى يضربني واستخدم كل أساليب الإهانة معايا لحد ما قررت أطلق وطلبت منه الطلاق ورفض فرفعت عليه دعوى خلع ومازالت الدعوى منظورة أمام القضاء".
تابعوا آخر أهل مصر على Google News
