انفعلت الإعلامية بسمة وهبة، على الهواء، قائلة: 'الكل مسك في معلمة المنصورة اللي بترقص، وساب كل اللي كان معها، والسيدة لم ترقص في فصل، أو أمام الطلاب'.
وخلال تقديم برنامج '90 دقيقة'، على قناة 'المحور'، دافعت وهبة عن معلمة المنصورة، التي انتشر لها مقطع فيديو وهي ترقص مع معلمين أخرين، حيث جرى إحالتها للتحقيق وتعرضت لهجوم شرس على منصات التواصل الاجتماعي، قائلة: 'فين الجريمة؟!.. هل رقصت في مدرسة؟!.. رحلة فيها طلاب؟! هل أهملت وسابت شغلها ورقصت؟! فين؟! وبالنسبة للمدرسين الرجالة اللي كانوا بيرقصوا ويتصوروا وكان واحد منهم متحزم وبيرقص، ده عادي؟! جيتوا على الأنثى والرجل ده عادي؟! هو مش مدرس زيه زيها؟! ومحمد رمضان اللي بيطلع على المسرح وبيرقص عريان ويستفزنا وكل ما نستفز ننبسط ويقلع لنا زيادة'.
وتابعت وهبة: 'لو الرقص يتنافى مع مهنة التدريس، يبقوا تعاقبوا المدرس ومحمد رمضان، بعض الرجالة على التيك توك بتفتح بيوتها وتصور ستاتها وتتاجر بيهم، بس محدش بيتكلم ولا بيقول إن دي جريمة، لكن لما ست تعمل كده يتحرك الأوصياء ويطالبوا بتحكيمها'.
وأوضحت وهبة أنها ضد وجود كل تيك توك دون ضوابط والقنوات اللي مفتوحة على يوتيوب دون ضوابط، وضد التجارة بأسرار البيوت، وضد استغلال الأطفال، مستطردةً: 'لكن لما تعاقب يبقى تعاقب كله، عاقبوا المدرسين التانيين وعاقبوا محمد رمضان، متخلوش في خيار وفقّوس'.
تابعوا آخر أهل مصر على Google News
