ياسمين عز عن مباراة القمة: جوزك لو فريقه خسر متبقيش إنتي والزمن وأصحابه عليه

علقت الإعلامية ياسمين عز على مباراة القمة 125 التي تجمع بين الأهلي والزمالك في الدوري المصري الممتاز، غدًا السبت، على ستاد القاهرة'.

مباراة القمة

وخلال برنامجها «كلام الناس»، والذي يعرض عبر قناة «إم بي سي مصر»، اليوم الجمعة، قالت عز: «الماتشات اللي من النوع ده بيكون لها طقوس خاصة في البيت، الأجواء بتكون مكهربة، لو اتصلتي بخطيبك ومردش عليكي، متزعليش منه، لأنه بيكون في دنيا غير الدنيا».

وتابعت عز: «لو جوزك معرفش ينام النهارده وسرحان، ما تستغربيش مش عشان عنده أرق أو بيفكر في واحدة غيرك، وهو بيفكر في نتيجة ماتش بكره وبيسأل نفسه أسئلة كتيرة، زي يا ترى كهربا هيبدأ أساسي بكرة ولا لأ؟ جدو فيريرا هيبدأ بـ عبدالشافي ولا عمر جابر ناحية الشمال؟ محمد شريف هيرجع مخيف ولا لسه مش في الفورمة؟ هل سامسون ممكن تكون بدايته الحقيقية في الماتش ده ولا هيحصّل زكريا الوردي، وقائمة من الأسئلة الكتيرة، أنتي لا تعلمي شيء عن الصراع اللي في دماغه».

وأكملت عز: «من فضلك حاولي تتفادي جوزك خلال اليومين دول، وبلاش تصدري له مشاكل أو تطلبي منه طلبات ملهاش لازمة اليومين دول بالذات، ولو فريقه خسر، متبقيش إنتي والزمن وأصحابه اللي بيحفلوا عليه، اوعى تقربي منه على الأقل 3 أيام، ولو فريقه كسب، يا سعدك يا هناكي هتلاقيه اتحول للعفريت اللي في مصباح علاء الدين، اطلبي واتمني زي ما انتي عايزه».