إزاي أخلي الراجل يحبني؟.. رضوى الشربيني توضح الوصايا العشر لفشل العلاقات العاطفية

قدمت الإعلامية رضوى الشربيني، عدة نصائح للسيدات، بعد سؤال إحدى المتابعات لها قالة: إزاي أخلي الراجل يحبي؟.

وخلال تقديم برنامجها ردت 'الشربيني' على سؤال المشاهدة قائلة: 'هقولك 10 حاجات تعمليها وهي:

الوصايا العشر لفشل العلاقات العاطفية

- السمع والطاعة ولو قالت متنزليش لازم تسمعي كلامه.. أهم حاجة يرضى عليكي

- ألبسي اللي على مزاجه حتى لو مش عاجبك المهم هو اللي مختاره وعاجبه

- تسمحي له يكلم كل البنات اللي هو عايزيهم وهو حر يعمل اللي يعمله

- لو علق عليكي أنك تخينة شوية أو رفيعة شوية تجري تعملي عملية من سكات

-الاهتمام.. وتكلميه 24 ساعة وتسأليه أكلت شربت صحيت نزلت

- اقطعي مع كل صحابتك عشان يحس أنه الوحيد اللي في حياتك

- تكوني الطرف اللي بيصالح دايما وتبدأي بالصلح وتجيبي هدايا على طول

- الجدعنة.. مرمطي نفسك وأعملي كل اللي يحبه حتى لو عايز لبن العصفور

- حسسيه أنه الروح اللي بيتنفسه وأنك هتموتي من غيره وأنك متمسكه به

- نفذي دول وأدي دقني لو حبك ولا وقعد شهرين على بعضهم معاكي

وعلقت الشربيني قائلة: «ازاي أصلا أشوف وأفكر إزاي الراحل اللي في حياتي يحبني؟.. إن شاء الله ما عنه حبني، اللي يحبني يحبني على بعضي بشكلي وطريقتي وبصوتي الهادي أو صوتي العالي وبشغلي وطريقة لبسي، ولازم يعرف أنه هيحب الباكدج على بعضه وساعتها هيتشال فوق الراس، لو مش هتحبني كدة في بلايين من الرجالة على كوكب الأرض غيرك يحبوني وهعرف أحبهم».

واختتمت :«مستحيل أفكر إزاي أرضى راجل هأأأوو، اللي يحبك يبقى زي ما أنتِ ياما بوسة كبيرة لبابا ولماما وطنط وإحنا مش عايزينه، وأي بنت بتعمل العشر حاجات اللي قولت عليهم يبقى تأكدي أنه ماشي ومش هيكمل معاكي وهيطفش منك».