وجهت الإعلامية ياسمين عز، نصائح للسيدات بمناسبة عيد الأضحى، قائلة: 'عيد سعيد عليكي وعلى فرعونك الصغير، وحبيت ألفت نظرك لحاجة مهمة، وهي أن أسبوع العيد مش عشانك علشان جوزك يرتاح فيه من تعب الشغل، أنتي مريحة طول السنة وخدتي إجازة في العيد الصغير، نبدل بقى وتعالي على نفسك اليومين دول شوية ومردودهم عليكي هيكون هايل'.
وخلال حلقة اليوم من برنامجها كلام الناس عبر شاشة 'إم بي سي مصر' تابعت عز: 'نضفي علشان الراجل يلاقي البيت فلة وشمعة ولو عندك وقت فراغ اشتري اتنين كيلو ممبار وشليهم في الفريزر وحطيهم علشان تطلعيهم وتحمريهم لجوزك'.
حكمي عين العقل مش عين العجل
وأكملت عز: 'بحذرك من دوشة قرودك الصغيرين لأن الراجل بيكون عاوز هدوء وأكم من خناقات ومشاكل حصلت بسبب الموضوع ده، وحضري الأكل لجوزك من بدري بدال ما يروح مكان تاني، حضري ممبارك وبفتيتك ورقاك علشان الراجل لما يطلع حاجة يلاقيها'.
كما وجهت 'عز' نصيحة للزوجة بشأن شراء الرقاق قائلة: استخدمي الرقاق الفلاحي البلدي بلاش رقاق اليومين دول، هاتي رقاق بلدي من المخبز بلاش بتاع السوبر ماركت، لأن البلدي لما تسقيه مش يبوش التاني بيبوش.
وتابعت عز: 'بلاش خناقة الجردل والحلة بتاعة أول يوم العيد اللي هي بينك وبين حماتك وأخوات جوزك الغزلات على مين هياخد إيه من الأضحية، وكل واحدة ماسكة جردل أو حلة، ولكن محدش ليه حق يمسك الحلة غير حماتك وهي اللي تاخد عرق الفلتو والممبار والكبدة والمخ وتاخد اللي نفسها فيه حقها وأنت ماسكة حلة تاخدي لحمة المكعبات بتاعة الخضار.. بتتخانقي ليه مع جوزك ده الست واخدة الحاجات دي علشان تعملها ليكي أنتي وابنها ليه عاوزة كبدة وعكوة'.
واستكملت: فاجئي جوزك بحاجة حلوة وبلاش عكننة ونكد ويلاقي مصطلحاتك تحولت لواحد بيتاجر في الأعضاء ليه تتخانقي إن أخت جوزك خدت جوهرة العجل هي يعني خدت أحجار كريمة؟ دي حاجة ما يحصلش عليها خناقة، حكمي عين العقل مش عين العجل.
وواصلت ياسمين عز: مش عاوزين نسمع الجملة الشهيرة إن حماتك خدت الفخدة ومش هعمل لك فخدة، فخدة إيه اللي بتتحط على وش الفتة، أنا بشوف غرائب وعجائب، أكسبي حماتك وجوزك وافرحي بالعيد في حاجات أحسن من الفخدة ارضي علشان لما تكبري تلاقي الجردل قدامك بلاش تحولي أي حاجة لخناقة ملهاش لازمة.
واختتمت: 'كم من بيوت فيها خناقات بين الحماة والزوجة أول يوم العيد والعيد بيتحول لنكد وحزن وهم، وفي الآخر كله هياكل وهيشبع واللمة بتحلى، واللي ياخد ياخد خليكي الكريمة وكبيرة البيت وفي الأول والآخر نفسك الجميل هيطلع في كل حاجة'.
تابعوا آخر أهل مصر على Google News
