عمرو أديب منفعلًا: النور بقى يقطع ساعتين.. إيه الحكاية؟

طالب الإعلامي عمرو أديب؛ الحكومة بكشف حقيقة زيادة فترة انقطاع الكهرباء لمدة تزيد عن ساعتين يوميا على عكس المحدد في السابق.

وخلال برنامج 'الحكاية' المذاع على قناة 'إم بي سي مصر' قال أديب: 'قالولنا قدامكم لغاية 15 سبتمبر بالكتير وكان المفروض سبتمبر جانا وفرحنا به وخلاص ودلوقت احنا ملاحظين حاجة في التلات أربع أيام اللي فاتوا النور مبيتقطعش في المواعيد اللي قالوا عليها والأهم أنه مبقاش بيقطع ساعتين مش ساعة'.

انقطاع الكهرباء

وأضاف: 'النور بيتقطع دولوقت ساعتين في عز الحر؛ أنا عايز حد يقولنا ايه الحكاية وايه الموضوع؟ هل انقطاع الكهربا مستمر يعني هو ملوش علاقة بارتفاع درجة الحرارة أو يا جماعة قولولنا الحقيقة لسة الموضوع متحلش وقدامكم شهر كمان'.

وتابع: 'إحنا داخلين على مدارس والناس تعرف أن النور ممكن يقطع في أي وقت؛ أنا مبطلبش حاجة وعلى فكرة الناس اللي بتهبد ملناش دعوة بيها؛ أنا قدامي أن النور بيقطع ساعتين وبقي أي وقت'.

وواصل: 'هل في مشكلة؟ مش عيب مش إباحة قولولنا يا جماعة أن النور مش هيرجع تاني زي ما كان؛ النور هيفضل يقطع شوية؛ ماهو ياجماعة يعني إيه أزمة؟ بيبقي ليها ظواهر ونحن نعلم أننا في أزمة اقتصادية'.

وذكر: 'احنا كلمنا وزارة الكهربا وقالولنا لا هو مجلس الوزراء بس اللي هيتكلم؛ ولو سمحت يامجلس الوزراء قولنا بكل صراحة احنا مش هنرجع النور دلوقت لأن المعاد اللي تعهدت بيه الأمور أصبحت أسوأ أو تقولي مثلا أخر سبتمبر؛ زي ما اتقال أول مرة يوم الأربع الجاي وبعدين اتقال نص سبتمبر وأنا بقول لحضراتكم أن هذا الأمر مستمر ولن ينتهي خلال الأيام اللي جاية؛ وللأسف الجو لسة بايخ؛ النور مش بس مؤثر على الكهربا والتكييف ولكن مؤثر على المدارس والأسانسيرات والتلاجات'.

واختتم منفعلا: 'على فكرة الشعب دة جدع أوي ولكن قولي إن في مشكلة؛ المعاد عدى وعدد الساعات زادت ويقولون ودي بقى اشاعات؛ أن احتمال يكون النور مفروض يقطع ساعة أو ساعة وربع'.