مصطفى بكري: عندنا جيش قاعد على الحدود وسط الحرب وقائد وطني مابينامش إلا ساعات محدودة

كشف الإعلامي مصطفى بكري جهود الدولة بقيادة الرئيس السيسي لمجابهة الإرهاب.

وعلق بكري خلال برنامج حقائق وأسرار المذاع عل قناة صدى البلد: الرئيس السيسي نجا من محاولات اغتيال ونظف سيناء من الإرهاب.. الوضع صعب بس عندنا أمن وأمان.. لما بشوف السوشيال ميديا بعرف أن فيه حرب ممنهجة.. بلدنا عاشت روف وطردت مستعمر وماشوفناش اللي بيحصل دا

وتابع بكري: ياما الرئيس السيسي صوته اتنبح وقال كل واحد بيشتغل بمزاجه وفيه ناس مش عاوزه البلد دي تقف على رجلها.. لو حصل حاجة للبلد دي لا تاريخ ولا جغرافيا هترحمنا.. لازم نتحمل ونقف للفساد.. كل واحد عامل فيها مناضل ولسانه قد كدا وكان حاطط إيده في إيد الإخوان.. اتقوا الله في مصر.

وأكمل قائلا: الشعب المصري شعب وطني ومقاتل والبلد دي هتقف وسننتصر.. وزي ما قال الرئيس السيسي لازم نقف ونتماسك مع بعض.. هناك جيش قاعد على الحدود وسط الحرب وقائد وطني مابينامش إلا ساعات محدودة.. مش شايفين سيناء كانت إيه وبقيت إيه.. الإرهاب اندثر لكن هناك خلايا نائمة.