هنأ الإعلامي أحمد موسى، فريق الأهلي وجمهوره؛ بعد الفوز على الزمالك اليوم، في قمة الدوري المصري، بهدفين مقابل لا شيء.
أحمد موسى في بث مباشر على صفحته الرسمية بمنصة فيسبوك قال: النهاردة خلاص الأهلي والزمالك 2-0. ماتش جميل، ماتش حلو، يليق بالكرة المصرية، يليق بقمة الديربي الأهم في المنطقة وإفريقيا والشرق الأوسط.
وتابع أحمد موسى: كنت متوقع فوز الأهلي 3 من امبارح، وكان عندنا ثقة بعد ربنا سبحانه وتعالى أولا، والثقة في رجالتنا، إن النادي الأهلي عنده لعيب أفضل، وفيه زملكاوية كتير جدا كانوا شايفين إن الزمالك مش هيفوز وإن الأهلي هو اللي هيفوز.
وأضاف أحمد موسى: بالنسبة للتحكيم، محدش يقدر يتكلم على التحكيم خالص، تحكيم أجنبي مش تبع حد، قد يكون نادي الزمالك عنده بعض الملاحظات على التحكيم، وده إحنا متعودين عليه ومكن نشوفه كتير.. لكن بشكل عام مبروك للنادي الأهلي.
وواصل أحمد موسى: بالمناسبة، أول ما دخلت جورنال الأهرام، كنت عايز أشتغل في قسم الرياضة، وبعدين قالوا لي إن فيه مكان ثاني، فالاختيار لله سبحانه وتعالى وكل شيء يكون نصيب. أنا طبعا بحب الكرة وكنت بلعب كرة وما زلت بلعب كرة،
وبشأن الجدل حول وجود ضربة جزاء للزمالك، صرح قائلا: قد يكون هناك ضربة جزاء بس أنا مش حكم، لو كان فيه فار ورجعوا له وشافوا إنها ضربة جزاء، أكيد الحكم ما كانش هيجامل الأهلي؛ العدالة أهم، وإحنا دايما كلنا بندور على العدالة.
واختتم أحمد موسى: عمري ما كنت متعصب.. ما فيش حاجة تستحق التعصب؛ إحنا في الآخر بنتكلم عن روح رياضية.. وأنا بحب الأهلي وبشجعه وما بحبش أنه يتغلب، دي ثقافتنا.. لكن الرياضة فيها فوز وخسارة.
تابعوا آخر أهل مصر على Google News
