وفاء صادق تكشف كواليس مسلسل "لن أعيش في جلباب أبي " (فيديو)

كشفت الفنانة وفاء صادق، كواليس مسلسل "لن أعيش في جلباب أبي" وقالت إن نجاح المسلسل بسبب الحالة التي وصلت لفريق العمل عن طريق المخرج أحمد توفيق والفنان نور الشريف والفنانة عبلة كامل وسهير الباروني.

وخلال حوار لها ببرنامج "الستات مبيعرفوش يكدبوا " تابعت صادق: كنا بنحاول نبوظ اللبس اللي هنظهر بيه عشان يبان في أسوء أشكال، واللي ساعدتنا في ده الفنانة سهير الباروني لما جابت معاها ورد وخرز ومسدس شمع عشان نلزق بيه الحاجات دي في اللبس فيظهر بأنه بلدى أوي.

وواصلت صادق: الأكل اللي كان موجود في "فرح سنية" كله أكل بيتي لأنه معمول فعلا في بيوت عبلة كامل وسهير الباروني وفنانين آخرين، والمخرج أحمد توفيق قرر ميكونش في غداء في يوم التصوير ده عشان نكون جعانين وناكل بجد.

وعن الفنانة عبلة كامل قالت: فظيعة بجد وكانت أكنها أمنا بالظبط مش مجرد تمثيل، وفى مرة، قررت أنها هتجيب لينا الغداء من البيت وميكونش في غداء تبع الإنتاج، وكانت المفاجأة أن كل الأكل عبارة عن بتنجان بكل أصناف سواء مسقعة أو محشى وغيره.