شهدت محاكم الأسرة العديد من قضايا الخلع والطلاق خلال هذا الاسبوع، باختلاف الأسباب والدوافع، أبطال هذه القصص أشخاص عاديون، ولكن كتب لهم القدر أن تسجل أسماؤهم فى سجلات القضاء.
وترصد " أهل مصر " أغرب القضايا التى طرأت على محكمة الأسرة هذا الأسبوع.
سمر: "أبوه ربطني وطفى السحاير في جسمي عشان ياخد مرتبي"
"بيجبرنى أنزل أشتغل بحجة ان البيت محتاج مصاريف كتير وأنا لازم اساعد، وللأسف كنت بصدقه، ويوم القبض الاقي أبوه مستني عشان ياخد منى القبض ويسيب لى ١٠٠ جنية اروح بيها مواصلات من ٤٠٠٠ مرتب، وطول الشهر بتذل عشان حماتى تبعت لقمة أو جوزى يشترى حاجة، ولما رفضت أنهم ياخدوا مرتبي، وأنا هصرف منه على البيت أبوه ربطنى وطفى فى جسمى السجاير وهو واقف يتفرج".. نطقت سمر بهذه الكلمات أمام محكمة الأسرة أثناء نظر دعوى الخلع التى أقامتها ضد زوجها بعد 9 شهور فقط من الزواج مبررة استحالة العشرة معه.
جمال: "خانتنى مرة تانية عشان سامحتها فى الأولى"
" متجوز من ٧ سنين، وأنا كنت أكبر منها بـ ١٠ سنين، وبراعى ربنا فيها لأنى اتجوزتها صغيرة، لكن للأسف هى محترمتش دا وبعد جوازنا بسنة اكتشفت أنها بتكلم واحد متجوز على النت، وحصلت مشكلة وصممت إنى أطلقها لكن أهلها ادخلوا وأنها لسة صغيرة وطايشة وهو ضحك عليها، وبعد ضغط كبير من الأهل سامحتها ورجعتها، وأقسمت بالله انها مش هتعمل كدا تانى، وخلفت منها ولدين عشان أكتشف بعد ٧ سنين انها بتخونى للمرة التانية، وفي رسايل من عشيق ليها على التليفون".. اشتكى جمال زوجته بهذه الكلمات أمام محكمة الأسرة، لرفع دعوى تطليق ضد زوجته مبررا استحالة العشرة معها، بعد خيانتها له مرتين.
بسمة: "عملت أكونت مزيف وكلمت جوزي لقيته مصمم يتجوزني عرفي"
" كنت دايما بحس انه بيخونى، وبيتجوز عرفي، لكن دايما عامل نفسه ملاك وانه عمره ما خاننى، لحد ما اتأكدت بنفسي لما عملت أكونت مزيف باسم بنت، واتكلمت معاه أكتر من شهرين ولقيته بيكلمنى ليل ونهار على أساس أنى واحدة أول مرة يتعرف عليها، كان بيهرب من جنبي على السرير، عشان يروح يكلمنى على النت، لحد ما عرض عليا اننا نتجوز عرفي، ولما رفضت قالى نتجوز رسمى".. بهذه الكلمات شكت بسمة زوجها أمام محكمة الأسرة بعد ٤ سنوات من الزواج مبررة استحالة العشرة معه، بعد أن أكتشفت خيانته بنفسها.
ريهام: "بقالي 3 سنين مش عارفه احبه وخايفة اخونه"
"جوازة اتفرضت عليا، عمرى ما تقبلته من أول يوم شفته فيه، لكن أهلى كانوا شايفين انه مافيش حاجة أبدا تعيبه، وحاولت انى اتقبله، 3 سنين تحت سقف بيت واحد ومش عارفة احبه، منكرش انه محترم وطيب وبيحبنى جدا، لكن انا مش عارفة أحبه، وحاسة انى مجبرة على كل حاجة معاه، ولما رفض يطلقنى طلبت الخلع أحسن ما أفكر فى غيره وانا على ذمته".. بهذه الكلمات شكت ريهام أمام محكمة الأسرة لرفع دعوى خلع منه بعد ثلاثة سنوات من الزواج مبررة استحالة العشرة معه.
جهاد: "بيمشي وهو نايم وبيقعد يصوت طول الليل"
لم تتخيل جهاد أن حياتها ستنقلب رأسا على عقب بعد الزواج مباشرة، عندما تكتشف أن زوجها يعانى من مشكلات فى النوم، حيث يسير وهو نائم ويصرخ طوال الليل، وهو ما جعلها تقف على أعتاب محكمة الأسرة لرفع دعوى خلع منه مبررة ذلك بقولها: "خدعني هو وأهله ومحدش قال لي الحقيقة انه عنده مشكلة فى النوم بيمشي وهو نايم غير صوته اللى طول الليل يا بيشخر أو يصرخ وروحنا لدكاترة كتير وشيوخ ومافيش أى فايدة واكتشفت ان دي حالة ملازمة ليه من صغره وهو مخبي عليا".
تابعوا آخر أهل مصر على Google News
