تجار الفاكهة: سمسرة البيع ومصاريف النقل وراء أزمة ارتفاع الأسعار في الفيوم

اشتكي بائعي الفاكهة والخضروات بمحافظة الفيوم من تفاوت اسعار المزروعات ما اثر علي سعر الفاكهة هذا الموسم وإطلاق حمله للمقاطعة تحت شعار "خليها تحمض".

أكد ابو وليد جمعه أحد تجار الفاكهة بالجملة في مدينه سنورس الفاكهة بالفعل غلت بطريقه مجنونه وانا كتاجر جمله بخسر خلال تلك الايام انا بشتري العنب الاحمر ب 5 جنيه من الغيط وبيصرف عليا 75 قرش مصاريف نقل وطريق وسمسرة ببيعه باصله علشان ما يطيرش زبونى منى ولو الفاكهة باتت بنبيعها بنصف ثمنها.

وتتابع "ام عبدو" الايجارات نار والكهرباء نار العيشة كلها جهنم تلك كلمات بائعه الموز بالجملة احنا مش عارفين نسدد الديون اللى علينا ولا عارفين نلم فلوس الناس مؤكده ان تجارة الموز كانت من أفضل التجارة دلوقتى بقت زيها زى اى تجارة فى حاله تدهور اصحاب المزارع رفعو سعر الموز بعد قرار الحكومة بمنع زراعته والموز لازم يتزرع سنويا لان شجرة الموز تطرح مرة واحد فقط وتنشف على طول

وقال المعلم نصر المحل دة بيصرف على أكثر من 4 اسر مش عارفين نعيش بسبب ارتفاع سعر الفاكهة السنة دي وقال ان سعر الجوافة من المزرعة ( الغيط ) ب 9 جنيه وبتصرف من جنيه الى 2 جنيه نقل وطريق وحمولة ورسوم طرق وسمسرة.

وقال المعلم محمد على احنا زينا زى المواطن بنصرخ باعلى صوت نعمل ايه الفاكهه غاليه على ابوها ومصاريف النقله بتعدى الالالف جنيه حموله ربع نقل بخلاف احنا بنشترى كاش وبنبيع بالاجل لتجار القطاعى وبنحصل بعد البيع ويا حصلنا ثمن النقله يا استلفنا ثمنها علشان نجيبها ثانى يوم بخلاف ثمن ( البرانيك ) اللى بقت اسعارها مولعه بتروح مننا وبيشتريها تجار الخردة من البياعين

وقالت ام محمد احدى تجار الفاكهه القطاعى بنشترى كيلو العنب جمله من 5.75 الى 6 جنيه وبنبيع الكيلو وربع والكيلو ونصف بعشرة جنيه ونيجى اخر النهار ما بحصلش فلوس الناس.

واكدت ام احمد سيد احدى تجار الفاكهه وقالت انا اشتريت زرع ب 2000 جنيه وحياة عيالى ما قدرة المهم الفاكهه بتيجى فى برانيك ومتشوشه الفوق زرع زى الفل واللى تحت استغفر الله العظيم واكدت كيلو العنب البناتى ب 15 و17 جنيه البرنيكه بتيجى نصفها فرط جملتها من 12 الى 14 جنيه وقالت هنعمل ايه نقعد فى بيوتنا ونموت من الجوع والا نشتغل ونصرف على عيالنا.

وقال "محمد" أحد تجار الفاكهة قطاعى يا باشا الفاكهه بتيجى لونها زى الفل وطعمها استغفر الله العظيم بخلاف الجوافه مدودة بنشتريها جمله من 10 الى 11 جنيه وبنبيعها من 13 الى 15 جنيه ما البرنيكه بتيقى ليها وش ودة ابو 15 جنيه وباقى البرنيكه بنبيعه ب 13 جنيه وعلى اخر النهار الباقى بنبيعه ب 8 جنيه لان الجوافه بتحمر بعد ما بتطلع من البرنيكه ونيجى نلم فلوس الناس ما بنلاقيش الحصاله ( اصل الثمن ) والله احنا مش عارفين مين بيرفع الاسعار تجار الجمله والا اصحاب المزارع زى ما بيقولو تجار الجمله.