مها من داخل محكمة الأسرة: "بيخبي مرتبه مني وفلوسه كلها لأمه واخواته"

" كل حاجة بيخبيها عنى، حتى مرتبه معرفش بيقبض كام، هو بيشتغل وكل الفلوس لأهله، والمصروف مش بيكفينا أنا وبنتى، ولما طلبت أنه يزود المصروف رفض واتخانق معايا وغضبنى عند أهلى، وقعد شهرين مايبعتش ولا مليم وأهلى اللى بيصرفوا علينا".. بهذه الكلمات شكت مها زوجها أمام محكمة الأسرة فى دعوى نفقة لطفلتها بعد أن امتنع زوجها عن إرسال أى مصروفات لها ولابنتها.

٣ سنوات من الزواج

روت الزوجة مأساتها لـ"أهل مصر" حيث إنها تزوجت منذ ٣ سنوات زواجا تقليديا من "أحمد" يعمل بتجارة الملابس قائلة: "اتجوزت من ٣ سنين مكنتش اعرف حاجة عنه، واشترط اننا نسكن فى بيت أهله، ووافقت وبعد الجواز اكتشفت انه بخيل فى الفلوس وكل أسراره مع أهله، حتى معرفش هو معاه كام، دايما يشكى انه مش معاه، وأنا بشوفه بعنيا وهو بيدى كل فلوسه لأمه وأخواته".

رفض يزود المصروف

وعبرت مها عن ضيق الحال التى كانت تعيش فيها حيث قالت: "كان عامل مصروف لى كل شهر ولما خلفت بنتى طلبت منه انه يزود المصروف، لأنها بتحتاج لبن صناعى وأدوية رفض، وحدث خلاف كبير بينا لدرجة أنه ضربنى وغضبنى عند أهلى، قعدت شهرين مبعتش فيهم مليم واحد حتى لبنته، وأهلى بقو يصرفوا علينا، وهو ما صدق اننا مشينا عشان ميتحملش مسئولية".

رفع دعوى نفقة

وأكملت حديثها بأنها حدثته فى الهاتف ولكنه أغلق المكالمة فى وجهها، مما اضطرها الذهاب إلى محكمة الأسرة لرفع دعوى نفقة ومازالت الدعوى منظورة أمام القضاء.