تنظر محكمة جنح الخليفة المنعقدة بزينهم، بعد قليل، أولى جلسات محاكمة 5 متهمين في واقعة اكتشاف أعمال سحر اللاعب مؤمن زكريا في مقابر الإمام الشافعي، في القضية رقم 6904 لسنة 2024 جنح الخليفة.
وقبل بدء محاكمة المتهمين، ينشر موقع «أهل مصر» نص التحقيقات مع اللاعب مؤمن زكريا أمام النيابة العامة، وجاءت كالأتي:
س/ ما تفصيلات بلاغك؟
ج/ اللي حصل أن لقيت واحد قريب زوجتي اسمه مصطفى كلمها وقالها إن فيه واحد جارهم اسمه محمد إمام قاله إن فيه ناس لقوا عمل معمول لمؤمن في المقابر، عشان كان العمل معمول على صور بتاعتي، وكمان كان فيه عروسة مربوطة من إيديها ورجليها ودبابيس وكان عليهم طلاسم، وقالولي تعالى المقابر عشان تشوف العمل، قالولي أحنا كنا بنحفر عشان نزرع صبارة، وهناك لما وصلت قابلت الناس اللي اتمسكوا وكان معاهم واحد هرب.
وأضاف مؤمن زكريا: هناك وروني الحاجة في مية بملح والورق كان دايب في المية وكان فيه صورتين واحدة كبيرة وواحدة صغيرة عليها طلاسم وكان في عروسة متربطة من الإيد والرجل كان مكتوب عليها طلاسم والورق كان محطوط في المية ودايب وبعد كدة أخدنا العروسة وبقيت الورق واتخلصنا منهم، وهناك كان فيه واحد بيصور الموضوع دا من وقت مانا دخلت المقابر واستاذنته أنه ميصورش ويمسح الصور دي ومحدش ينزل حاجة ولا ينشر حاجة، وبعد كدة فوجئت بتداول الصور على مواقع التواصل الاجتماعي ونشر أخبار عما أثناء وجودي في المقابر وهو دا كل اللي حصل.
س/ متى وأين حدث ذلك؟
ج/ أنا روحت مقابر الإمام الشافعي يوم الأربعاء 25/9/2024 الساعة 10 مساءا ويوم السبت اتفاجئت بالصور منشورة على مواقع التواصل الاجتماعي، ويوم الأحد لقيت المذيعة ريهام سعيد بتتكلم في الموضوع دا وكانت مستضيفة اللي اسمه محمد عمر ونشر الفيديو اللي كان مصوره.
س/ ما علاقتك بالمتهمين تحديدًا؟
ج/ أنا معرفهمش بس محمد إمام دا هو اللي جار قرايب مراتي وهو اللي تواصل مع مصطفى وكلم مراتي وقالتلي على الموضوع.
س/ ما هى بادرة لقائك بالمتهمين؟
ج/ أنا روحت المقابر وقابلتهم يوم الأربعاء وروحت لقيتهم مطلعين الحاجة اللي بيقولوا معمولي عليها العمل والعروسة وحاطين الورق في مية بملح، ولما روحت وروني فيديو للحاجة وهما بيطلعوها من المقابر عشان أبقى متأكد انها فعلا كانت مدفونة في المقبرة.
س/ ما هو دور كل متهم تحديدًا؟
ج/ أنا لما روحت لقيت محمد عمر كان واقف بيصور الواقعة أثناء حضوري بالمقابر ودون علمي ولما اكتشفت التصوير طلبت منه يمسح الصور والفيديوهات اللي اخدها ومينشرهاش ولا يستخدمها ومطلبش مني أي حاجة وبعدين اكتشفت أنه نشرها في مواقع التواصل الاجتماعي وتم استضافته في برنامج ريهام سعيد ونشرها دون علمي بقصد التربح المالي والحصول على أموال مقابل والتشهير بيا.
وتابع مؤمن زكريا في نص التحقيقات: التربي رمضان محمد هو اللي بلغني أنه لقى الحاجة مدفونة في المقابر وحطها في مية بملح، وجيت لقيت الصور بتاعتي والعروسة مكتوب عليهم طلاسم، والعروسة كانت متكتفة من الإيد والرجل وفيه ورقة كان عليها طلاسم بس دايبة جوه المية بقصد ايهامي بوجود عمل مدفون بالمقابر، وباقي الناس كانت واقفة أثناء وجودي بالمقابر، وابن التربي بس أنا مش عارف اسمه بالكامل كان موجود وقتها.
س/ بم تتهم المتهمين تحديدًا؟
ج/ أنا بتهمهم كلهم بالنصب والتشهير بيا على مواقع التواصل الاجتماعي عن طريق تكوين تشكيل عصابي وكان قصدهم ينصبوا عليا وتحصيل مبالغ مالية واستعمالهم لطرق احتيالية من خلال نشر الأخبار على مواقع التواصل الاجتماعي دون رضائي من أجل الحصول على مبالغ مالية من خلال تداول أخباري.
تابعوا آخر أهل مصر على Google News
