أنا مش بستريح لما العمل يكون فيه مشاهد ساخنة.. كلمات أدلى بها يوسف الشريف في لقائه ببرنامج 'مساء dmc' أشعلت مواقع التواصل الإجتماعي، وتم تحريفها بأنه يرفض ملامسة النساء، والبعض اتهمه بأنه ينتمي للإخوان، وكثيرون هاجموه مشيرين إلى أنه يُزايد على زملائه، فيما دعمه البعض الآخر من جمهور ونجوم من الوسط الفني.
'أهل مصر' ترصد كلام زوجة يوسف الشريف وعدد من نجوم الوسط الفني الذين دعموه.
تعليق إنجي علاء زوجة يوسف الشريف
علقت إنجي علاء، زوجة يوسف الشريف، على الهجوم الذي تعرض له زوجها، وكتبت عبر حسابها بموقع التواصل الإجتماعي 'فيسبوك': 'في أخبار كتير عن يوسف متداولة متحرفة بس بزيادة شوية، يوسف اتكلم عن المشاهد الساخنة وأعرف فنانين كتير تانيين مش بيحبوا يعملوها.. إيه اللي جاب ملامسة النساء للموضوع، أوفر أوي بصراحة!!'.
نجوم الفن يدعمون يوسف الشريف
كتبت أيتن عامر عبر حسابها بموقع التدوينات 'تويتر': 'بصراحة ما اتضايقتش خالص من انترفيو يوسف الشريف، وبصراحة مش فاهمة الدوشة دى كلها ليه أنت حر ما لم تضر . بس كدة، و معتقدش انه ضر حد بمعتقداته أو قناعاته شابوه يا عّم'.
كما علق الشاعر أمير طعيمة على أزمة يوسف الشريف، وكتب: 'بتوع حرية الرأي واللي دائما بيدافعوا عّن كل اللي يغضب ربنا، بيهاجموا الراجل اللي عايز يرضي ربنا في شغله وبيرفض تقديم ما يخدش الحياء في أعماله. وأصلا ما فرضش رأيه علي الآخرين، هو فقط مختار لنفسه طريق مريحه وناجح فيه. يا جدعان النفس اللي بيخرج منك ممكن ما يرجعلكش، ما تبقوش كده'.
ودعمت ناهد السباعي الفنان يوسف الشريف عبر حسابها الرسمي بموقع التواصل الإجتماعي 'فيسبوك'، وكتبت: ' هو ليه الناس بتطالب بالحرية الجنسيه للشواذ وتنتقد راجل رافض المشاهد الساخنة لأسبابه الخاصة دي حرية شخصية ودي حرية شخصية، مش عجبك متتفرجش عليه ومتشتغلش معاه'.
وعلق المؤلف عمرو محمود ياسين وكتب: 'أنا مش عارف يوسف الشريف قال ايه يالضبط.. لكن كل اللي أقدر اقوله ان هو حر إن لم يضر. المهم انه فنان وإنسان محترم وبيقدم فن محترم أيضا ومختلف'.
وذكر إسماعيل شرف، موقف مع يوسف الشريف وكتب: 'أول مرة اتشرفت بالشغل مع الأستاذ يوسف الشريف كان فى مسلسل الصياد الحقيقة هو كان له نصيحة ليا واحنا بنصور قالى ابعد عن أى حاجة فى الشغل ممكن تغضب ربنا هو ما بيفرقش بين ده شغل ودى حياتى الخاصة كل حاجة بتعملها بتتحسب عليك أنا فى رأى ان ده مبدأ يحترم جدا من فنان محترم بيقدم فن محترم وفى الأول وفى الآخر ده قراره الشخصى وهو حر فيه تحياتى أستاذ يوسف'.
ومن نجوم الفن الذين دعموا يوسف الشريف أيضًا، كريم فهمي، حيث كتب عبر حسابه على 'إنستجرام': 'الراجل ده أنا بحبه وبحترمه في العموم مخلص ومجتهد وحر في رأيه ويحترم'.
وكان رد هشام ماجد قويا على من انتقدوا تصريحات الفنان يوسف الشريف حيث كتب: 'في بعض الناس سواء شغالين في المجال الفني أو صحفيين أو ناس عادية استغلوا الكلام اللي قالوا يوسف الشريف في برنامجه مع رامي رضوان وابتدوا يهاجموه وقاموا ناشرين حاجات لأفلام قديمة عملها عشان يثبتوا انه كان بيعمل الحاجات دي عادي وانه يعني كدة بيدعي الفضيلة و كدة'.
وتابع: 'الفصيلة دي من البني آدمين هما تاني ....... حاجة بعد الكورونا كل الاحترام ليوسف الشريف، فنان راقي و محترم بيتعب علي شغله وبيحترم جمهوره وكل الإحترام لأي حد متفق او مختلف مع كلامه بس باحترام، و كل واحد ليه الحرية في أفكاره طالما بيحترم اللي حواليه ومبيأذيش حد، مش عاجبك كلامه تقدر ماتتفرجش علي أعماله أو تقدر متشغلوش، إنما تطلع تقطع وتشوه فيه بحجة انك المحامي المدافع عن حق الفن وحرية الإبداع تبقى شخص ناقص، بس كدة، كلمتين كانوا حزئني ... اتفضلوا استلموني معاه'.
وكتب محمد أنور: 'ايه كل الهري والكلام الفاضي وقله الأدب اللي حصلت عشان الراجل ده قال انه عنده مبدأ معين هو انه ضد المشاهد الساخنه أو الأحضان والبوس والكلام ده لأنه ببساطه بيخاف ربنا ومش عاوز يغضبه وهو شغال بالمبدأ بقاله أكتر من عشر سنين وناجح بيه وربنا كارمه من وسع كمان وانه هو مش ضد اللي بيعمل عكس كده ولا شايف نفسه اكتر احتراما من حد'.
وأضاف: 'فجأه كل الناس شايفاه رجعي ومتخلف ومش فنان وناس قالو ده اخوان وناس قالت طب روح حجب مراتك الاول وبعدين اتكلم وناس طلعتله مشاهد من اعمال قديمه هو بيحضن فيها وقالو ايام ماكان بيحب التلامس وكميه قله ادب في موضوع الراجل طرحه بكل احترام وقال انه فيه ممثليين كتير زيه اصلا مش بيحبو يعملو ده او ندمو اصلا علي اعمال هما قدموها في البدايه وبعدين شافو انه ماينفعش انه يعمل كده تاني'.
واختتم حديثه: 'علي فكره بقي هو صح والله العظيم وانا نفسي اللي لسه ببدأ عملت حاجات وندمت اني عملتها ونفسي ربنا يسامحني عليها، افتكر انك لما بتموت وانت سايب صدقه جاريه بتنفعك في قبرك وتزود حسناتك ..ممكن كمان تعمل عمل'.
تعليق رامي رضوان على مهاجمي يوسف الشريف
ووضح الإعلامي رامي رضوان الذي استضاف يوسف الشريف وتسببت حلقته في الكثير من إثارة الجدل وكتب: ' عنونت بعض الصحف نقلا عن لقائي مع النجم يوسف الشريف الذي أذيع أمس..انه قال 'أضع بنود في عقود أعمالي لرفض ملامسة النساء، والحقيقة أن سياق الكلام كان عن رفضه للمشاهد الساخنة في أعماله ووضح ما يعنيه في الحوار'.
أول رد من يوسف الشريف
من جانبه، قال يوسف الشريف عبر تويتر: ' مش عارف ازاي كلمة المشاهد الساخنة اتحولت لملامسة النساء عموماً لازم نفترض حسن النية، وطبعاً المشهد ده أصلاً ملوش أي علاقه بالكلام ده. ده مشهد عادي جداً وتخيل ان كل الدوشه دي بسبب تصريح من حساب مزور. كذبوا الكذبة وصدقوها'.
لقاء يوسف الشريف مع رامي رضوان
وكان يوسف الشريف، قال في برنامج مساء dmc الذي يقدمه رامي رضوان: 'بدأت أحط قيود على أعمالي بعد فيلم (هي فوضى) ٢٠٠٧، ودي حاجة بقالها ١٠ سنين، وفعلا بدأت أفكر بالطريقة دي طالما مش بتضر حد، وهذه القيود بحطها لنفسي زيادة عن أي حد، وقد تصل للعقود '.
وأضاف 'فيه فرق، لما يكون عندي مبدأ معين وفكر معين، وأنا مش بستريح لما العمل يكون فيه مشاهد ساخنة أو قبلات أو أحضان، ومبحسش إنه صح، فبدأت أحط قيود واطبقها في الحياة وعلى نفسي'.
آخر أعمال يوسف الشريف
وشارك يوسف الشريف في رمضان الماضي بمسلسل 'النهاية'، وتدور أحداثه بعد 100 عام من الآن أي في عام 2120، وفي وقتها لا توجد بلاد بل يوجد عالم واحد يحكمه كيانان، ويجسد يوسف الشريف في مسلسل النهاية شخصية مهندس بكيان منهما، ويمثل الكيانان الحكومة التي تحكم.
تابعوا آخر أهل مصر على Google News
