لا تزال مشكلة هالة صدقي حديث مواقع التواصل الاجتماعي، بعدما اتهمها زوجها بأنها حملت في أبنائه بشراء بويضات من سيدة أخرى، حيث شكك الزوج في نسب الأطفال منها وطالب بعمل تحليل DNA.
رد الفنانة هالة صدقي على اتهامات زوجها
الفنانة هالة صدقي، من جانبها، ردت على اتهامات زوجها، وعلى تعليقات بعض المتابعين للقضية، وكتبت عبر حسابها بموقع التواصل الاجتماعي 'فيسبوك': 'تخيلوا ناس لا أعرفهم ولا يعرفوني وبيفتشوا في أدق تفاصيل حياتي أنا وعيالي، وبحاول بكل الوسائل ألا أنجرف للمستنقع ده لأنه يمس سمعة أولادي، إلا أنه شيء قذر جدا لما كل واحد يعمل أبو العريف، وينشر ويأكد على حاجات ما يعرفهاش'.
وأضافت: 'أولا للناس الجهلة، سألت حد متخصص، قال ان اللي بيعملوا قصة التلقيح وشراء بويضات وكده لازم موافقة الأب والأم وصاحبة البويضة والمستشفى، ولازم يتأكدوا ان البويضة تكون صالحة، وحاجات كتير جدا، يعني مش أي حد يروح يشتري بويضة من السوبر ماركت'.
وتابعت: 'ثانيا مفيش حاجه اسمها الأب ما يعرفش، أومال هيجيبوا منين الاسبريم، ولا هي بيضة بتفقس، ثالثا، لما أنا بالتحديد أحب أعمل حاجة زي دي أروح أمريكا مش لندن، رابعا، إيه اللي يجبرني أعمل كده وأنا أساسا الخلفة ما كانتش أهم طموحي، خامسا، كان أسهل قوي اني أتبنى طفل'.
قضية هالة صدقي وردها عليها
وواصلت هالة صدقي، الرد على المتابعين وتوضيح الموقف، قائلة: 'سادسا، للجهلة اللي بيفتوا أن الكنيسة بترفض تماما إصدار أي تصريح جواز إلا لما الزوجين يعملوا تحاليل كاملة ويتأكدوا ان الزوجين يقدروا يخلفوا، وكمان الچينات بتاعتهم تنجب أطفال أصحاء، وأن جواز الأقارب مرفوض وغير مستحب'.
وأوضحت: 'أنا مش بدافع عن نفسي أنا بدافع عن أطفال ملهومش أي ذنب غير أن أبوهم خانه الانتقام مني بقصة سخيفة ليس لها أي شيء من الصحة.. بيولول ان أمه ما شافتش الولاد، وأخوه موجود يحكيلكم ان أنا وأخويا اللي دبحوه شتيمة على الفيسبوك وعلى صفحته أخد الولاد وراحوا زاروها، وهو بنفسه بعتلي رسالة شكرني، وأخوه موجود اسألوه'.
وتابعت: 'كفاية أنها ماتت وهي غضبانة عليه، كفاية ان أهله كلهم قاطعوه بسبب أعماله، كفاية انها قالت له أن خسارتك الحقيقية هي هالة نفسها، وأبوه طبعا، العقل المدبر، اللي شركة ولادي اللي عملها بفلوسي ومجهودي اتحولت فجأه وبقت باسمه، لأني كنت طبعا بثق في الزوج والسند وخليته رئيس مجلس الإدارة، لكن امبارح بس رفعت قضية نصب واحتيال علشان الشركة اللي اتسرقت، وطبعا بعد صمت خمس سنين علشان قانون العيب، والعربية اللي جبتهاله آخر موديل استخسر يسيبها لأولاده لما هاجر وسابها لأبوه، وبرضه الحقيقه حرام يتقال علي النموذج ده لقب أب'.
وأضافت: 'تم عدة بلاغات ضد الزوج والمحامي والموقع والصحفي اللي تداولوا هذه القصة وتناسوا حجم التدمير لأطفال ولأم عانت خمس سنين في صمت حفاظا على شكل الأب، اللي مصمم يسحبني في هذا المستنقع، وعلى فكرة أنا مرحبة جدا بفكرة DNA لأتمكن من إنقاذ ولادي من أب غير مسئول لاستخدامه سمعتي وشهرتي للتشهير ضاربا عرض الحائط بمكانتهم'.
زوج الفنانة هالة صدقي وعلاقاته النسائية
وأضافت هالة صدقي في منشورها الطويل: 'الأب اللي بيولول زي الستات علشان يشوف ولاده.. هما موجودين، حضرتك اللي رميتهم وسافرت، سيادتك اللي فضلت انك تاخد الجرين كارد اللي أنا عاملاهولك بسبب باسبوري الأمريكي على إنك تقعد مع عيالك، حضرتك اللي فضلت مغامراتك النسائية القذرة على إنك تكون أب وطبعا أي حرف بقوله معايا مستنداته وصورك ومكالماتك مع صديقاتك اللي أغلبهم منحرفين.وتساءلت هالة صدقي: 'أي أطفال دول حضرتك اللي انت حتي ما تعرفش هما في سنه كام، أي أطفال اللي عمرك ما فكرت تشتري لهم هدية حتي ولو تافهة؟. بدل ما حضرتك بتشتري لنفسك السنيهات كنت تبعت لولادك شبشب بلاستيك، أي أب ده اللي يدمر حياة أطفاله ويمنعهم من السفر ويحطهم على منع سفر زي المجرمين، أي أب ده اللي لما طلبت منه يصرف عليهم يقولي حطيهم في... بلاش دي، أو وديهم مدرسة حكومية، أي أب ده اللي يجري على المحكمة بعد وفاة أمي علشان يعرف ورثهم من جدتهم إيه'.
وتابعت هالة صدقي باستنكار وسخرية: 'الشهر اللي فات كنت أنا أمهم لو انت هتاخد فلوسهم بحكم إنك الولي الشرعي، وبعد ما القاضي رفض مرتين طلبك بقيت مش أمهم بقدرة قادر، إيه الأفكار الشيطانية دي، إيه الأب ده اللي عمره ما حضر بطولة ولا تمرين ولا مرض ولا فرح ولا عيد ميلاد، أي أب ده اللي يبيع أرض أولاده بمليون وميتين، ويرفض يشتري كوتشي لابنه ويقوله معييش فلوس، أي أب ده اللي رجع مصر مرتين علشان يعمل توكيلات ويبيع الأرض من ورايا وياخد فلوس عيالي ويحطها باسم أبوه في البنك، في كل مرة يقول للولاد اشتريت حاجات كتير بس الشنطة ضاعت، بنتي ضحكت عليه، قالتلي يا مامي في المرتين الشنطة بتضيع، اشمعني خالو باسم كل شهر بيبعت شنطة فيها حاجاتنا'.
واختتمت حديثها قائلة: 'لما نحب نشهّر ونطلّع أسلحة قذرة كنت أحب ده يكون بعيد عن أولادي وعن الميديا، بس هي دي أسلحه الضعفاء. للأسف نجح إنه يسحبني للمستنقع وأنا مش بعيب على الصحافة ولا على اللي بيفتوا، بعيب على النموذج اللي رمي أولاده ومراته للبشر ينهشوا في لحمهم من غير رحمة، مصممة على عدم الصلح كما ذكرت مع سيد علي، أمس، ومصممة على إني أعمل تحليل DN A علشان تكون وصمة في جبينه قدام أولاده العمر كله، مصممة إني أدافع عن أولادي اللي ربنا ابتلاهم بأب زي ده، وبعتذر لهم على اختياري وعلي دفعهم ثمن شهرتي، وَيَا رب تكونوا اتسليتوا بقصصنا اللي الأب المحترم رماها على الميديا لابتزازي، وبشكره لأني لو حاولت أكره ولاده فيه ماكنتش هعمل أكتر من اللي عمله، وفعلا قطع آخر خيط رفيع بينهم، ودلوقتي اتأكدت من إحساسهم لما غيروا لقبهم واسمهم إلى 'صدقي' مش باسمك، حسابه عند ربنا تقل قوي هفضل محاوطة عليهم وأحميهم منه لآخر يوم في عمري'.
حديث زوج الفنانة هالة صدقي
وكان سامح زكريا زوج الفنانة هالة صدقي، قد تحدث أن طفليه اللذين يعيشان مع الفنانة هالة صدقي، ليست والدتهم الحقيقية، وهي أول من بدأ باللجوء إلى القضاء، وتابع زكريا: 'أنا أعترف أن هؤلاء أولادي بنسبة 100% ولكن هالة ليست والدتهما الحقيقية'.
وخلال مداخلة هاتفية ببرنامج 'حضرة المواطن' الذي يقدمة الإعلامي سيد علي عبر شاشة قناة 'الحدث اليوم' الفضائية، أكد زكريا أن الفنانة أجرت جراحتين للحمل ولكنهما فشلتا، وأوضح: 'هالة قامت بزرع بويضات من سيدة أخرى دون علمي وموافقتي ولذلك أطالب بتحليل الـ DNA'.
تابعوا آخر أهل مصر على Google News
