صلاح عبدالله عن تعصب السوشيال ميديا: "فين بقى التسامح والمحبة؟"

كتب : حسن الحيني

أكد الفنان صلاح عبد الله أنه يفضل لقب الممثل عن لقب "النجم" أنه كان في البداية يحب كلمة "مشخصاتي"، لخفة دمها قائلا: "بحبها أوي لخفة دمها بس قدمت شوية ولما كنت بعمل مسرح كنت بحب كلمة "مضحكاتي"، لأن الهدف الأساسي من المسرح إضحاك المتفرج".

وأضاف صلاح عبدالله في حواره مع الإعلامية لميس الحديدي عبر برنامجها "كلمة أخيرة " المذاع على شاشة "ON" قائلا: "بعد كده بقيت ممثل لاني بحس إن قيمتي كصلاح عبد الله أني ممثل وأنا دائماً بببقى ناسي إني ممثل لكن لما بيجي ناس تسلم عليا بيفكروني إني ممثل".

وواصل عبدالله: "أما على السوشيال ميديا لما بلاقي ناس بتتفاعل معايا وبتفكرني بأدوار معينة وإفيهات قلتها، دول بقى بيحسسوني بنعمة ربنا عليا وبحس وقتها إني محبوب بجد".

وأشار إلى أن كونه محبوبا الأهم بالنسبة له معتبرا أنه لم يفكر يوماً في بدايته أن سيصبح صلاح عبد الله المحبوب وأنه كان يحب التمثيل منذ أن وعي على الدنيا.

وتابع قائلا: "أنا بقيت زملكاوي بسبب أسرتي لأن والدي وإخواتي وجميع أقاربي كانوا زملكاوية وبالتالي بقيت زملكاوي بالوراثة لكن بقيت ممثل ليه ؟ مش عارف لأن ما فيش حد في العيلة بقى ممثل ووالدي كان موظف في وزارة الصحة وأمي كانت ربة منزل وظيفتها إدارة المنزل لأنها من قامت بإدارة والدي".

وأكمل: "ليه بقول إن أمي هي الي أدارت أبويا لأنها أخدت قرارات مهمة فلما جينا ننقل من بولاق أبو العلا لبولاق الدكرور هي من أخذت القرار وأخذت الأرض وهي من قامت بالبناء كانت بتعمل كل حاجة لأن أبويا بطبيعة وظيفته كان بيقضي معظم وقته في الشغل لكن أبويا كان راجل نشيط وكان بيصحى الصبح يعملنا الفطار لما أمي تعبت وهنا جاء دوره وشال أمي وشالنا وبعدين لما تعب أخويا الكبير شالنا كلنا".

واستطرد: "عشان كده كنت بقول على السوشيال ميديا في أحد أشعاري الزجلية هيا حلاوة روحنا راحت ولا فاضل منها حبة.. أصل حلاوة روحنا كانت في التسامح والمحبة".

وتساءل "فين بقى التسامح والمحبة دلوقتي وهل الي بيحصل دلوقتي على السوشيال ميديا يعكس التسامح والمحبة دي؟".