حلمي عبد الباقي: نقيب الموسيقيين «لازم أيده تبقى نضيفة».. ومصطفى كامل رجل المرحلة

كشف الفنان حلمي عبد الباقي، اليوم الأحد، عن أسباب رفضه للترشح لمنصب نقيب المهن الموسيقية.

وقال "عبد الباقي"، في تصريحات خاصة لـ"أهل مصر"، "مينفعش أترشح في الوقت ده، أنا شايف أن مصطفى كامل هو الأنسب حاليًا لتولي منصب نقيب المهن الموسيقية ليه مبقاش أنا وهو موجودين في النقابة، إحنا مبندورش على أسباب شخصية عشان مين يمسك ومين ميمسكش إحنا كلنا عايزين نخدم النقابة، ومصطفى هو رجل المرحلة ولازم هو اللي يمسك".

وتابع:"القيادة لازم تكون الرجل للمناسب اللي بيحكم بالقانون وأيده نضيفه، يعني نفرض في مشكلة و الموسيقيين طرف فيها لازم يكون موجود وقاعد مع الناس وأيده معاهم ومكتبه مفتوح في أي وقت ولأي حد ودا المفروض فأي جهة ما مش بس نقيب الموسيقيين، الإدارة مسؤولية، فلازم يكون قد المسؤولية ويقدر يواجه المشاكل وواقف مع الناس ويعرف مشاكل الناس أيه ويحلها وبكده يبقى قائد بجد".

واختتم كلامه برسالة لنقيب الموسيقيين المستقبلي قائلًا:"رسالتي للي هيمسك النقابة،عايز أقول أن المُلك مش دايم ، وما دايم إلا وجه الله، والناس اللي ساعدتك تقعد على الكرسي لو مكنتش قد المسؤولية هما برضو اللي هيشيلوك تاني بسيطة جداً".