خالد سرحان يكشف تفاصيل الحالة الصحية للزعيم عادل إمام

كشف الفنان خالد سرحان، عن الحالة الصحية للزعيم عادل إمام، بعد التصريحات التي أثيرت أمس الجمعة، عن إصابته بالزهايمر.

وأوضح خالد سرحان، أثناء مداخلة هاتفية مع الإعلامي خيري رمضان، ببرنامجه "حديث القاهرة"، المذاع عبر شاشة "القاهرة والناس": "شوفت الزعيم قريبًا جدًا، والسوشيال ميديا جننت الناس، والتريند دا عمل خلل في الدنيا، ومش ممكن كل صفحة عايزة تاخد كم من المشاهدات، تطلع أي إشاعة عشان بيكسبوا من ورا دا، دي حاجة أنا مش فاهمه،ا سواء دا بيحصل من حد مسؤول، أو مش مسؤول".

وعن سبب عدم حضور عادل إمام حفل زفاف ابنة شقيقه، المنتج عصام إمام: "الناس بتسأل ليه الزعيم مرحش فرح بنت أخوه، أنت متخيل إنه ممكن يروح فرح فيه 2000 بني آدم هيتلموا عليه، دا ممكن الفرح نفسه يبوظ، مفيش حد يتحمل".

وأكمل خالد سرحان: "أستاذ عادل كويس جدًا، وهل عقلية كبيرة زي عقلية الزعيم يجيلها زهايمر يعني؟ الراجل برضه مركز وعارف وصحته بخير الحمد لله، مفيش أي حاجة خالص وهو زي الفل".

وتابع: "هو ساعات بيسخر من الصفحات اللي بتقول إن عادل إمام في المستشفى، فالموضوع بيقلب بسخرية لأنه كتر أوي، أنا بطمن الناس على صحة الزعيم هو زي الفل، ومن حق الناس تخاف عليه لأنه في وجدان المصريين كلهم، ولكن رفقًا بالناس كفاية إشاعات هما بني أدمين برضه وأولاده ممكن يزعلوا وأحفاده، لأنهم شايفينه كويس، وكل شوية شائعات بتفّول عليه".

وواصل سرحان حديثه قائلا:" فيلم الواد وأبوه دا المفروض أنه بيجمع بين الزعيم وابنه محمد، ومن إخراج رامي، وهما بيحضروا له وعصام إمام هينتجه، والأستاذ عادل هيرجع إن شاء الله للشاشة، متسمعوش للشائعات السخيفة".