أعربت الإعلامية سهير جودة في برنامجها 'الستات'، المذاع عبر فضائية 'النهار'، عن استيائها الشديد، من الهجوم على الفنان ياسر جلال، بعد إعلانه التبرع بمبلغ مالي كبير لصندوق تحيا مصر، دعما لبلده مصر في ظل الأزمة الاقتصادية، التي يمر بها العالم، موجهة الشكر للفنان ياسر جلال.
اعتراض للاعتراض
وأضافت سهير ، أن ما يحدث الآن يؤكد أن المصريين أصبحوا أعداء انفسهم، قائلة: «مستحيل يكون في أي تفسير تاني غير إننا أعداء نفسنا، احنا بنحب نعترض وخلاص، نعترض من اجل الاعتراض، ياسر جلال بجد قدوة، وهو اتبرع في هدوء، مكلمش صندوق تحيا مصر وقالهم انا هتبرع، كانت مفاجأة ليهم».
وأشارت سهير: 'احنا طول الوقت معترضين، لكن اللي عمله ياسر جلال بعيدا عن تطرف تفكير بعض الناس، هو رسالة مهمة جدا ودعوة لكل الفنانين المصريين، ولكل القادرين للتبرع، لأننا في مرحلة صعبة، التبرع مش فرض على حد، ده إحساس، اللي عايز يتبرع باي مبلغ يتبرع، اللي عايز يعلن براحته، ياسر مكنش عايز يعلن، لكنه اتضطر'.
وأوضحت سهير جودة: 'انا شايفه ان ياسر جلال كان لازم يعلن تبرعه، لأن دي عدوى، عشان الماس كلها تتشجع وتتحمس، اللي قادر وعايز واللي شايف انه ممكن يتبرع يروح يتبرع، ده مش فرض ولا اجبار على حد، احنا هنا بننتقد الشخصيات العامة لو اتبرعوا، ولو متبرعوش بنقول هما ازاي متبرعوش وبيكنزوا فلوسهم ومش بيفكروا في حد خالص'.
تبرع ياسر جلال
أعلن الفنان ياسر جلال، عن تبرعه بمبلغ ثلاثة ملايين جنيه لصالح صندوق تحيا مصر، اليوم، وقال ياسر جلال، لـ'اليوم السابع': «المرة ديه بعلن عن الجهة والمبلغ اللي اتبرعت بيه، لأني بتمنى إن كلنا نشترك، ونعمل اللي نقدر عليه، وبدعي زملائي النجوم أنهم يتبرعوا باللي يقدروا عليه، عارف إن في منهم عمل الموضوع قبل كده، بس لو عملوا ده تاني يبقي شيء عظيم وتابع ياسر جلال: «يعلم ربنا إن السبب اللي خلاني أعمل كده هو الأزمة اللي بتمر بيها مصر دلوقتي، أنا راجل لا غاوي شهرة ولا نجومية، أنا بشتغل وبخلص شغلي وبروح أقعد مع مراتي وأولادي، وبعمل ده لأن كلنا شايفين إن البلد بيمر بأزمة كبيرة، والعالم كله بيمر بأزمة كبيرة، وإن شاء الله الأزمة تعدي لما كلنا نقف جنب بعض»، وحرص على إنهاء حديثه بالدعاء لمصر.
تابعوا آخر أهل مصر على Google News
