الناقدة ميرفت عمر تدافع عن منى زكي: محدش يتكلم عن عمل قبل عرضه

تحدثت الناقدة الفنية ميرفت عمر، نائب رئيس مهرجان الإسكندرية السينمائي، على الهجوم الذي تعرضت له الفنانة منى زكي مؤخرا، بعد ظهورها بالحجاب في بوستر مسلسل 'تحت الوصاية'، المنتظر عرضه في رمضان 2022.

وقالت ميرفت عمر في تصريح لـ 'أهل مصر': 'مش شايفة إنه فيه حق أبدا لأي حد يخليه يتكلم عن عمل فني قبل ما ينزل، ومن ضمن الهجوم أن منى زكي بتجسد الطيار الوهابي، وهابي ايه؟!، أغلب الستات في مصر لابسة الحجاب عادات وتقاليد، وزي بيحميها وحشمة، ملوش علاقة بتيار وهابي أو غيره، ده ملوش علاقة، بلاش نسوق لحاجة مشفنهاش، لما يتعرض العمل ونشوف بيتكلم عن إيه نبقى نتكلم عنه ونتكلم عن أن العمل بيطلع الست اللي مش محجبة مش مهتمة بنفسها'.

وتابعت: 'في المطلق في سيدات كتير مش مهتمين بنفسهم سواء محجبة او غير محجبة، ولو دي القضية او لو دي مشكلتها اللي هتقابلها في المسلسل فده ملوش علاقة لابسة حجاب او لا، ياما سيدات لابسين حجاب ومهتمين بنفسهم جدا، مش مقياس بصراحة، أتمنى أن الظاهرة دي تتلاشى ونحكم على العمل الفني بعد ما نشوفه، لان فيه جهد كبير بيبذل عشان يظهر أي عمل فني للنور، مافيش داعي اننا نقلل ونتفه من جهد ناس وتعبهم وفلوس اتصرفت، ولو تلاشت الدنيا هتختلف تماما'.