حلت الفنانة ليلى علوي أمس ضيفة في برنامج “كلمة أخيرة” الذي تقدمه الإعلامية لميس الحديدي بقناة “أون إي، وتحدثت عن تفاصيل فيلمها الأخير الذي يحمل أسم 'شوجر دادي'.
قالت ليلى علوي: 'شايفة أن ثقافة الناس دلوقتي في تقبل الأعمال الفنية الجريئة أفضل من 10 سنين مضوا، وأعتقد أن فيلم بحب السيما لو اتعرض دلوقتي الرقابة المجتمعية هتقبله ومش هيبقى فيه رفض'.
وأشارت: 'المجتمع بقى مجهد جدا دلوقتي والناس ماشية في الشارع متنحة وبحس ان الهم مسيطر علي الناس'.
وتابعت ليلى علوي:'الناس بقوا مهمومين مستقبلهم ومستقبل تربية ورعاية ابنائهم جدا دلوقتي، والنصوص الفنية والدرامية بقت قشرة ومبتغوصش في أحوال وظروف الناس والمجتمع ومشاكلهم وأحوالهم، وعلشان كده انا قررت مكملش في الدراما واروح ناحية السينما تاني'.
قالت علوي: 'بيحصل كتير إن الرقابة بتشيل مشاهد كتير حتى من الأفلام الكوميدية، أنا عملت كوميدي كتير ولكن بيوحشني التنوع'.
وتابعت: 'أنا قررت السنة دي مشتغلش دراما خالص واهتم بالسينما ويمكن علشان أنا متوفقتش بالدراما وأنا مش عايزة اشتغل الـ30 حلقة خالص والسينما مريحة عن التليفزيون'.
وتابعت ليلى علوي: 'أنا زهقت من التمثيل بسبب شغل الـ30 حلقة في المسلسل، يعني أنا مثلا النهاردة اشتغلت من 7 الصبح وخلصت 7 بالليل وساعات بنشتغل الـ24 ساعة وأحيانا بعيط من التعب والإجهاد وبتصعب عليا نفسي وبقاوم وأجاهد علشان اطلع نتيجة كويسة'.
فيلم شوجر دادي
تصدر فيلم 'شوجر دادي ' قائمة الإيرادات الأسبوعية، حيث إنه حصد ما يقارب من مليون و600 ألف جنيه في الأسبوع 24 من تواجده بالسينمات، ليصبح بذلك هو أعلى مشاهدات.
وتدور أحداث فيلم شوجر دادي في إطار كوميدي حول رجل يمر بأزمة منتصف العمر، وتقوده مراهقته المتأخرة إلى إقامة علاقة سرية مع راقصة، لتنقلب حياته وحياة أسرته رأسا على عقب.وعن فريق عمل الفيلم فهو يضم نخبة من الفنانين ومنهم 'ليلى علوي، بيومي فؤاد، تامر هجرس، حمدي الميرغني، مصطفى غريب، محمد محمود، مي الغيطي، فرح الزاهد، جوهرة، وعدد آخر من الفنانين، ومن ضيوف الشرف هشام عباس الذي يقدم أغنية أيضا خلال الأحداث، ومروان يونس وسارة الدرزاوى'.
تابعوا آخر أهل مصر على Google News
