إيناس النجار: الراجل التونسي أعظم رجل في العالم و المصري فيه "ديفوهات"

تحدثت الفنانة إيناس النجار، عن الفرق بين الرجل المصري والرجل التونسي، مؤكدًا أنها لا يمكنها أن ترتبط برجل بخيل خاصة وإذا كان بخيل في مشاعره.

كشفت إيناس النجار، عن الفرق بين الرجل المصري، والتونسي، قائلة: عمري ما ارتبطت في تونس، وتقيمي للراجل التونسي على والدي، وأنا بشوفه أعظم أب وأعظم راجل في العالم الله يرحمه، أما الراجل المصري في رجالة كويسين أوي وبتفهم في الأصول وتعرف يعني إيه مسئولية بيت وعائلة وأنه مسئول عنك، ولكن ممكن يكون في ديفوهات زي ما في الرجالة التونسية ديفوهات، ولو حسبناها أكيد هتجوز من هنا راجل مصري، أنا كنت متجوزة مصري.

تصريحات إيناس النجار

وقالت إيناس النجار خلال حوارها مع الفنانة انتصار وبدرية طلبة ونوليا، في برنامجهم 'من غير نفسنة' المذاع عبر شاشة قناة 'هي': اللي معندوش ثقة في نفسه بلاش منه، والمستبد بلاش منه لأننا بنلاقي مستبدين كتير في حياتنا حتى العملية، والنرجسي بلاش منه، وبلاش من المسهوك لأن هيكون وراه مصائب ده تمثيل وبيكون عايز يوصل خاصة لو واحدة بتشتغل وناجحة، طيب وتستعجل ليه ما عني ما اتجوزت، تتجوز صح أو قاعدتها كده أحسن.

وتابعت إيناس النجار: ولكن في راجل طبيعي وكويس مش شرط يكون كريم الكرم الفظيع، ولكن أنا بشتغل وأنت بتشتغل واللي معانا يكفينا.

وأضافت: أنا مبحبش الراجل اللي يخبي أنا مدياك عمري وحياتي وسني وسنين حياتي كلها، أنت تخبي عليا ليه؟ المفروض أن الحياة دي بنتقاسم فيها كل حياتنا الزوجية والمعيشية والمادية، لأن الست بتدي الراجل كل حاجة، مشكلتنا أننا عاطفين شوية.

وأكدت إيناس النجار، أنها لا يمكنها الارتباط برجل بخيل، قائلة: عمري ما قابلت راجل بخيل لأني كريمة جدًا، ومستحيل واحدة كريمة ترتبط بواحد بخيل، ولكن كل اللي شوفتهم كذابين، ومستحيل ارتبط براجل نكون قاعدين أنا وهو نشرب قهوة وأدفع لنفسي أو أدفعله أنا، وفي بني آدمين بيبقوا بخلاء في المشاعر ودي أوحش من بخل الفلوس.

وأضافت: زمان كنت بحب الحياة ولكن كل حاجة كان ليها وقتها، وأكتر حاجة بضيع فيها فلوس لبسي، ولسة كنت مسافرة عملت شوبينج برقم خزعبلي، لو مكنتش صرفته كان زماني جبت بيه بيت.

‎“من غير نفسنة” برنامج نسائي ساخر يقدمه كلا من الفنانة انتصار وبدرية طلبة ونوليا، يعرض يوميًا من السبت إلى الثلاثاء، ويقدم عددًا من القضايا الاجتماعية بطريقته الساخرة والخاصة من خلال استضافة عددًا من الشخصيات المؤثرة على السوشيال ميديا والمشاهير والفنانين لمعرفة آرائهم في تلك القضايا.