طفلة وضعتها في ورطة.. ناقد فني يكشف موقفا عصيبا في حياة أمينة رزق

روى الناقد الفني إلهامى سمير موقفا عصيبا مرت به الفنانة القديرة الراحلة أمينة رزق، وذلك عبر حسابه الشخصي على موقع التواصل الاجتماعي فيسبوك.

وكتب إلهامى سمير عبر حسابه الشخصي على موقع التواصل الاجتماعي فيس بوك:'لما سألوا الست أمينة رزق عن الأيام الصعبة فى حياتها حكت عن يوم قالت إنه كان من أسوأ الأيام اللي شافتها..وقالت الست أمينة إن كان لها جيران عندهم بنت صغيرة كانت بتحبها أوي، ومن كتر حبها لها كانت ممكن تقضى عند الست أمينة اليوم كله، واتعودت الست أمينة لما تنزل تشتري حاجة انها تاخدها معاها'.

وتابع:'وفى يوم من الأيام يا سادة يا كرام خدتها ونزلت تشترى حاجات من السوبر ماركت، وبينما هى مشغولة بالشراء بتبص على البنت مالقتهاش، ففضلت تدور فى المكان كله مفيش طلعت الشارع تدور مفيش، طيب الشوارع اللى حواليها برضه مفيش، لحد ما قررت إنها تبلغ قسم الشرطة وفضلت تلف من قسم لقسم ومن مستشفى لمستشفى لمدة 20 ساعة، وطبعا خايفة ترجع لأهل البنت تقولهم بنتكم تاهت منى'.

وأضاف إلهام سمير:'فباتت الليلة عند خالتها ويومها فضلت طول الليل تتصل بالأقسام والمستشفيات لعل وعسى حد يقولها لقيناها لكن مفيش فايدة، الصبح قررت الست أمينة أنها ترجع لأهل البنت تقولهم اللى حصل وأمرها لله وأول ما رنت الجرس وأم البنت فتحت لها لمحت فى عينيها خضة خلت دقات قلبها تزيد أضعاف مضاعفة، لحد ما الست سألتها 'كنتي فين لحد دلوقتي ؟'، فالست أمينة قالت لها : 'أنا أسفة جدا' فأم البنت قالت لها 'أسفة إيه يا شيخة.. خضتينا عليكي.. أنا لما لقيت البنت رجعت لوحدها افتكرت إنك هاتتغدي برة..وفضلنا منتظرينك'.

وأختتم:'طبعا الست أمينة ما سمعتش باقى الكلام وقالت والفرحة ماليه عينيها 'البنت رجعت؟'.. فأمها قالت لها 'أيوه طبعا.. بعد ما خرجت معاكي بربع ساعة.. ماهى دلوقتى ربنا يحميها بتعرف السكة دي حتى وهنا أغمى على الست أمينة'.