ناقد فني يكشف قصة المجرم الذي دفع أمينة رزق إلى الفن

كشف الناقد الفني إلهامي سمير قصة المجرم الذي دفع الفنانة أمينة رزق إلى طريق الفن، وذلك عبر حسابه الرسمي على موقع التواصل الاجتماعي فيسبوك.

وكتب إلهامي سمير عبر فيسبوك: 'المجرم اللى دفع أمينة رزق لسكة الفن.. وقت ما أبوها مات كان فيه عصابة فى طنطا بتجري ورا فلوس المتوفيين.. وأول ما العصابة دى عرفت أن أبو الست أمينة رزق مات بدأت تخطط إزاي تستولى على فلوسه .. فراح واحد منهم لام الست أمينه وبدأ يتعطف ويتلطف وقالها 'أنا ممكن أساعدك فى تحصيل ديون المرحوم عند الناس اللى فى البلاد اللى جنبا.. وكل ده علشان خاطر البنت اليتمية دي'.

وتابع:'وبحسب ما ذكرت الست أمينة للكواكب'.

وأضاف: 'بدأ الراجل يخطط أنه هياخد امها ويروح بيها القري اللى فيها الناس المديونة لجوزها ويجمع أكبر قدر ممكن من الفلوس.. وهما راجعين يخلص عليها وياخد الفلوس ويهرب .. لكن يشاء القدر أن الراجل وهو ماشى من بيت الست أمينة ..وبينما بيتناقش مع مراته فى تفاصيل الخطة.. اختلف معاها فالست بدأت تهدده وصوتها أرتفع.. وفجأة صوتهم وصل لواحدة من جيران الست أم أمينة.. فراحت نقلت لها اللى سمعته .. ويومها الست قالت إحنا مالناش عيش هنا وقررت أنها تاخد بنتها أمينة واختها اللى كان اسمها امينة برضة وتنزل القاهرة'.

وتابع إلهامي سمير: 'في القاهرة اتعلقت أمينة وخالتها أمينة أكتر بالمسرح .. وراحوا من ورا أمها مضوا عقد مع يوسف بك وهبي على أنهم ينضموا للفرقة بتاعته.. وخلوا واحد من الجيران كان بيحب أمينة يمضى مكان امها .. وحطوا شرط جزائى 100 جنيه علشان لما امها تعرف ما تمانعش لأنها مش هتقدر تدفع المبلغ ده '.

وأكمل: 'طبعا امها لما عرفت ضربتهم هما الاتنين علقة محترمة.. وراحت ليوسف وهبي تطلب منه أنه يفسخ العقد لكنه رفض.. وهنا اضطرت الست أنها تقبل أن بنتها واختها يكملوا فى طريق الفن.. اللى زقهم عليه مجرم طنطا'.