عبر الفنان والإعلامي خالد عليش، عن سعادته بحصوله على حكم قضائي بـ رؤية ابنته 11 ساعة يوم الجمعة من كل أسبوع، مؤكدًا أنه خصيم كل شخص حاول أن يبعد بينه وبين ابنته.
وقال 'عليش' علي صفحته الرسمية بموقع 'فيس بوك': النهاردة انا خدت حكم تاريخي يارب يتنفذ علي خير، وتاريخي لأنه احسن حكم ممكن اخده في ظل ظروف قانون الاسرة السيئ لحين تعديله، واللي طلع الحكم قاضي مش واحد صاحبنا ف ده معناه ان الراجل قره و فهم و بيدي لكل واحد حقه'.
وأضاف: جه الوقت اللي اقول فيه اللي جوايا، حسبي الله و نعم الوكيل، انا خصيم لكل واحد او واحدة حتي يوم الحساب ساعدو بشكل مباشر او غير مباشر اني ما اشوفش بنتي بطريقة انسانية، كل حد كبير او صغير جريت وراه بالمكالمات عشان اشوف اي حلول ودية، حتى الحركات و الجروبات النسوية اللي بيدافعو عن الست و خلاص، اي حد بيكتب تعليق و هو مش فاهم حاجة'.
وتابع:' فاض بيا الكيل و العمر بيعدي و استحملت الكثير من الاتهامات الباطلة و علاقتي ببنتي بتبوظ يوم بعد يوم، وانا ملتزم بكافة الالتزامات المادية ناحيتها من اول يوم كاملة و زيادة كمان عن المستوي المادي و الاجتماعي اللي عايشين فيه و مع ذلك استحملت كتير و ماردتش، انا لا حول لي ولا قوة حاولت مع كل الحلول الرسمية و الغير الرسمية، تعبت من اللف في دوائر مغلقة،تعبت من نظرة والدي و والدتي المريضة اللي نفسهم يشوفو حفيدتهم و مش قادر اعملهم ده'.
مستطردا:' انا اوحش رجل في العالم و لكن ما استحقش اني ما يكونش عندي فرصة اتكلم و اخرج معاها و افسحها عشان علاقتي بيها تبقي كويسة، محدش يقولي انت السبب عشان سيبت ماماتها، انا و والدتها كان في بينا عشرة طيبة و ايام كتير حلوة ولكن لم يحالفنا التوفيق في النهاية و كل شئ نصيب و الانفصال كان برغبتها قبل رغبتي'.
فضلت ٥ شهور في مساومات اني معملش تنفيذ لحكم الرؤية حفاظا علي البنت و لكن ماماتها صممت و بعد التنفيذ كان مهانة و مذلة للطفلة و ليا بعدها مبقتش اروح و بعت انذار رسمي ليها بكده و مازلت في الاجرأت القانونية الجديدة بعد فشل المحاولات الودية اللي الحمدلله النهاردة خدت فيها حكم منطقي و مناسب.
محدش يقولي روح شوفها عند جدتها عشان انا مش هاعرف يبقي في علاقة طيبة بيني و بين بنتي و انا قاعد معاها ساعة عند جدتها و هما قاعدين جنبي و قعدتي تبقى كلها مذلة و مهانة.
تابعوا آخر أهل مصر على Google News
