مازالت أزمة إنقطاع الكهرباء وتخفيف الأحمال تزعج المواطنين وأولياء أمور طلاب الثانوية العامة الذين تعالت صرخاتهم بسبب انقطاع الكهرباء لمدة أكثر من 3 ساعات، واشتكوا من عدم التزام المواعيد المحددة لقطع الكهرباء من قبل الوزارة.
شكوى ولي أمر طالب ثانوي من قطع الكهرباء
وقالت «نانسي مرزوق» ولى أمر طالب ثانوية عامة: «إحنا في حالة لا يُرثى لها بسبب قطع الكهرباء، النور قطع على ابنى امبارح 3 مرات وهو بيذاكر كل مرة ساعتين، وحالته النفسية كانت صعبة واضطر يذاكر أون لاين عشان مفيش مراجعات».
وأضافت: «ابني رايح الامتحان النهاردة من غير ما ينام، دا يرضي مين؟، مستقبل عيالنا بيضيع لازم حل لمشكلة الكهرباء، الوزير ميقدرش يعيش 3 ساعات في الحر من غير كهرباء».
وتابعت: «عيالنا حالتهم النفسية سيئة بسبب صعوبة الامتحانات، ربنا يحفظهم ويسهل ليهم الصعب».
وقبل انتهاء الوقت ببضعة دقائق من امتحان اللغة الأجنبية الثانية تمنى أولياء الأمور التوفيق والنجاح لذويهم.
شكوى الطلاب من قطع الكهرباء
واشتكى أحد طلاب الثانوية العامة عقب انتهاء امتحان المادة الثانية من اللغة الأجنبية، من انقطاع الكهرباء أثناء المذاكرة، قائلًا: 'امبارح ليلة امتحان والنور قطع 8 ساعات ده يرضي مين ده، معرفتش اذاكر ونزلت اذاكر برة في الشارع ورجعت الساعة 1 لقيته لسه قاطع'.
وعبرت سهيلة محمد، عن استيائها من انقطاع الكهرباء لأكثر من 3 ساعات، وقالت: «الكهرباء قطعت أكثر من 3 ساعات واضطريت أذاكر أون لاين».
كما اشتكى طلاب الثانوية من انقطاع الكهرباء المستمر، وقالوا: «الكهرباء لما بتقطع الواحد مبيعرفش يذاكر والوقت مش كافي نحل في الامتحان، والكهرباء قطعت 8 ساعات والواحد مش عارف يذاكر، وبنذاكر لغاية الفجر، كل يوم في كده، وممكن قطع الكهرباء يؤثر على المجموع نهاية السنة».
طلاب ثانوية اسكندرية كان لهم رأي آخر في قطع الكهرباء، وقال أحدهم: «الكهرباء قطعت مرتين مرة ساعة ومرة 3 ساعات، وكنت بذاكر على الكشاف والموضوع صعب أني أذاكر من غير تكييف في أوضتي بسبب الحر'، بينما أضاف أحدهم: «الكهرباء قطعت 3 ساعات ونزلت قعدت على كافية عشان أذاكر الفرنساوي».
تابعوا آخر أهل مصر على Google News
