كشف أحمد خليل، شقيق 'نورهان' المتهمة بقتل والدتها في بورسعيد، بمساعدة جارها الطفل، تفاصل جديدة في القضية والتي شغلت تطورات أحداثها الرأي العام على مدار الأيام الماضية، حيث أكد أن شقيقته بريئة من قتل والدته، مناشدًا بتخفيف الحُكم الصادر بإعدامها.
المتهمة بقتل والدتها ببورسعيد مع أسرتها
شقيق "نورهان" المتهمة بقتل والدتها ببورسعيد: خوفها عليّا اللي وصّلها لكدة
وقال شقيق 'نورهان' المتهمة بقتل والدتها ببورسعيد، خلال تسجيل صوتي أرسله لـ'أهل مصر': 'أختي بريئة والله العظيم وكفاية أمي ماتت ومش مستعد أخسرها هي كمان، أنا شوفتها كذا مرة، هي ممكن تكون هناك بتكفّر عن أي ذنب هي عملته، لكن مش موت أمها'.
وأضاف شقيق المتهمة بقتل والدتها ببورسعيد باكيًا: 'هي قالتلي والله ما كنت أعرف إن كل ده كان هيحصل، وأنا ما شوفتش حاجة في إيد حسين المتهم، وخوفها عليّا اللى وصلها لكده'، مضيفًا: 'نورهان قالتي انت كنت كل حاجة وأغلى حاجة ليّا وما زلت لإنى مقدرتش أفتح لك الباب بسبب خوفي عليك إنك تتأذي، بس أنا هنا علشان فتحت الباب بحسن نية لحسين، أنا خوفت عليك إنك تتأذي ويعملولك عمل زي ما عملولي لكن خوفت أتكلم، لو حد غيرك كنت فتحت والله واللي يحصل يحصل'.
شقيق المتهمة بقتل والدتها ببورسعيد: خسرت أمي ومش مستعد أخسر أختي كمان
وتابع: 'كنت حابب أتكلم على أختي اللى إحنا عيشنا معاها وعارفين إن عمرها ما تعمل كدة، نفسي الناس تحس بيّا ويحطّوا نفسهم مكاني، أنا خسرت أمي ومش مستعد أخسر أختي كمان، أختي لو مش مظلومة أقسم بالله ما كنت اتكلمت ولا دافعت عنها، بس ربنا وحده يعلم إحنا كعيلة كنا متماسكين إزاي والناس عرفانا اسألوهم عننا'.
وأكمل: 'كل اللى طالبه بستسمح حضرة القاضي إن الحكم يتخفف، وينطق أي حكم بس بلاش حكم الإعدام، كفاية خسرت أمي، ده كل اللي عايز أوصّله وطالب إن الناس ترحمنا، إحنا مش مستحملين، ربنا ما يكتبها على حد، وطالب الناس تترحّم على أمي لإن فراقها صعب قوي علينا وعلى أخويا اللي لسة عمره صغير علشان كدة مش هنقدر نستحمل فراق أختي كمان لإنها كانت كل حاجة في حياتنا باعتبارها أمي التانية، صدقوني الفراق صعب قوي ربنا ما يجربه على حد'.
واختتم شقيق المتهمة بقتل والدتها ببورسعيد حديثه قائلًا: 'طلب أخير من الناس، حسّوا بينا بلاش كلام مؤذي وصعب قوي وبستسمحكم إنكم ترحمونا شوية وكفاية كلام وحطوا نفسكم مكاني، مفيش حد فينا مش بيغلط وربنا غفور رحيم، أي حد يحط نفسه مكاني فجأة لقيت نفسي خسرت أمي وهخسر أختي، إحساس صعب جدًا، مش هقدر أعيش من غيرها، كفاية أمي راحت، ومش بعترض والله على الحكم بس أي حكم غير الإعدام، مش هنقدر نعيش من غيرها حتى لو هشوفها كل فين وفين علشان أخوها الصغير'.
المتهمة بقتل والدتها ببورسعيد في خطاب من محبسها: نفسى الحكم ينزل لمؤبد للتكفير عن ذنوبي"
وكانت نشرت المستشارة هايدى الفضالى، محامية الفتاة المتهمة بقتل والدتها في بورسعيد بمساعدة الجار العشيق، على صفحتها الشخصية على موقع التواصل الاجتماعى' فيسبوك ' نص خطابات أرسلتها 'نورهان' من محبسها لعمتها، بعد تحويل أوراق قضيتها إلى فضيلة المفتي.
وقالت 'نورهان'، في الخطابات: 'والله قاعدة هنا ما بفكرش غير أنتم عاملين إيه وإزاى، وسط كلام الناس اللى يقتل وإخواتى بيروحوا مدارسهم إزاي وسط أصحابهم، وأبويا بيروح شغله إزاى وسط الناس، خطيبى بيتعامل إزاى قصاد أهله، وأصحابه اللى مراهن عليا قصادهم، أنتم أهلي بتواجهوا الناس إزاي'.
وأضافت 'نورهان': 'بيعيروكوا بيا، ساعات بتمنى أن يتنفذ حكم الإعدام عليّا وأموت وأخلصكم منّي، ومن الكلام اللى معيشكم فى قلق وخوف، وأرجع وأقول يا رب حُكمي ينزل مؤبد على الأقل أقدر أشوفكم، وأنا حتى فى السجن، أقدر أعيش وأكفر عن ذنوبى كلها، مش عارفة أي ذنب بالظبط اللي دخلني هنا وقضى عليّا، وعلى حياتي كلها'.
وتابعت 'نورهان': 'مش عارفة أنا بحاسب على إيه ولا إيه، والله العظيم اللى أحسن من أي حد وأي حاجة ما قتلت ولا أقدر أعمل كدة وانتي أكتر واحدة عارفة، إني عمري ما أقدر أعمل ده مهما كنت جامدة وقوية، ولوعلى موتي، والله العظيم ما كنت أعرف أنه هينفذ حاجة، عيل أصغر منّي بـ٣ سنين، عمري ما اقتنعت إنه يعمل حاجة زي كدة، ما كنتش أعرف إن الشر والغل اللي كان جواه من ناحيتنا وواثقة إن أهله كانوا عارفين وموافقين على كدة، لأنهم عارفين إنه مش هيتحاسب، وإنى اللي هلبس الليلة، وقت ما شوفته بيعمل كدة في ماما اتكسرت وخوفت وكنت متكتفة من الصدمة'.
تابعوا آخر أهل مصر على Google News
