تشهد محاكم الأسرة العديد من القضايا ودعاوى الخلع بأختلاف الأسباب والدوافع، أبطال هذه القصص أشخاص عاديون مثلنا ولكن كتب لهم القدر أن تسجل أسماؤهم فى سجلات القضاء.
ورصدت "أهل مصر" بعض قصص محاكم الأسرة على مدار الأسبوع:
سمر: جوزي بلطجي وبيرفع عليا السكينة
'ميعرفش يتفاهم من غير ضرب أو رفع سكينة من يوم ما اتجوزت وأنا عايشة فى رعب، بسبب انه بيضربنى على أتفه الأسباب ويرفع السكينة عليا ويهددنى بالقتل، لدرجة أنه في مرة خبطني في الحيطة دخلت في غيبوبة ولما فوقت لقيته قال لأهلى إني وقعت من على السلم لكن كذبته، وقررت انفصل عنه عشان تأكدت إن المرة الجاية هموت على إيده'.. نطقت بهذه الكلمات 'سمر' وهي داخل محكمة الأسرة لرفع دعوى خلع من زوجها بعد عامين من الزواج مبررة استحالة العشرة معه.
محمد: مراتي سرقت أبويا وهو على فراش الموت
بعد عامين ونصف من الزواج يكتشف محمد البالغ من العمر ٢٨ عاما، حقيقة زوجته والتي قامت بسرقة أموال والده وهو على فراش الموت؛ عندما أوهمت زوجها أنها ستقوم بخدمة والده، وهى فى الحقيقة جاءت لتدبر سرقة أمواله على حد قوله، مما جعله يقف داخل جدران محكمة الأسرة بعد وفاة والده لرفع دعوى تطليق من زوجته واتهامها بسرقة أموال والده.
إيناس: "جوزي بيعاملني زي أخته ومحاولش يقرب مني"
لم تتخيل إيناس أن حياتها الزوجية ستنتهى سريعا بهذا الشكل، حيث أنها لم تستغرق سوى أيام معدودة، لتعود من أجازة شهر العسل إلى محكمة الأسرة بزنانيري، لرفع دعوى خلع من زوجها مبررة ذلك بقولها 'من أول ما اتجوزنا وهو بيعاملني زي أخته، حتى محاولش يقرب مني بحجة إن الأيام لسة قدامنا، وأنا طبعا كنت محرجة ومش بتكلم معاه فى أى حاجة زى كدا، لحد ما قررنا نسافر شهر العسل وهناك اكتشفت إنه مش راجل ولما طلبت منه يروح للدكتور، قال لي لا أنا كويس الموضوع كله حسد مش أكتر، لحد ما طلب مني حاجة غريبة أعملها'.
هدى: جوزي على علاقة غير شرعية باختي الأرملة
'كانت كارثة ليا وصدمة عمري في أختي أكتر من جوزي لما عرفت أنهم على علاقة غير شرعية ببعض وكمان هو بيروح لها الشقة وبقالهم أكتر من 4 شهور بيمارسوا الرزيلة وهم غرقانين في المعاصى، لكن ربنا أراد أنه يكشف سترهم وشوفت رسايل بينهم وصور إباحية وكأنهم اتنين متجوزين، أنا مش عارفة ازاي هونت عليهم بالشكل دا وهان عليهم بناتي وسمعتهم'.. جاءت هذه الكلمات على لسان هدى 'اسم مستعار' وهي داخل محكمة الأسرة لرفع دعوى خلع من زوجها بعد 6 سنوات من الزواج مبررة استحالة العشرة معه.
مروة: جوزي ممكن يفرط في شرفه عشان كيس فاكهة
'عمرى ما كنت أتوقع إن زوجى يبقي بالأخلاق دي، أو إني أتجوز حد مستعد يفرط فى شرفه وعرض أهل بيته مقابل إن واحد يجى البيت ويسهر معاه مقابل إنه جاب كيس فاكهة أو شوية تسالى وكام إزازة بيبسي، ودا كله عشان بيبخل عليا بالمصاريف عشان يصرفها على كيفه وشرب الحشيش اللى قرب يطير دماغه'، قالت مروة تلك العبارات وهى داخل محكمة الأسرة لرفع دعوى خلع من زوجها؛ مبررة استحالة العشرة معه بعد عامين و3 أشهر من الزواج.
نسرين: خلاني أمسح بلاط عشان أصرف عليه هو وأبوه
من أول ما اتجوزنا وأنا عايشة في جحيم بسبب جوزى وحمايا، لدرجة أنهم قاعدين فى البيت وسايبني أنزل أشتغل وأمسح سلالم عشان أصرف عليهم، وجوزى بيتحجج أنه مش قادر وتعبان، وأحيانا مستنى شغل أحسن وأنا اللى مطحونة معاهم بقيت أذل عشان أجيب لهم اكل وسجاير لحد ما طفح بي الكيل لما ولدت ابنى وبدل ما أصرف عليهم أصرف على ابنى أفضل عشان كدا قررت أقف قدامهم ومخفش'، نطقت بهذه الكلمات نسرين وهى داخل محكمة الأسرة لرفع دعوى خلع من زوجها بعد عامين ونصف من الزواج مبررة استحالة العشرة معه بعد أن أنجبت منه الطفل الأول
تابعوا آخر أهل مصر على Google News
