شهدت محاكم الأسرة العديد من قضايا الخلع والطلاق بأختلاف الدوافع والأسباب، التى تدفع الزوجة إلى رفض العيش مع زوجها أو رفض الزوج البقاء مع زوجته، قصص مثيرة و قضايا مختلفة، أبطال هذه القصص أشخاصون عاديون مثلنا ولكن كتب لهم القدر أن تسجل أسماءهم فى سجلات القضاء، وترصد 'أهل مصر' أهم هذه القضايا على مدار الأسبوع.
سحر في دعوى خلع: "مقضيها فى شارع الهرم كل ليلة"
تقدمت سحر بدعوى قضائية أمام محكمة الأسرة بزنانيرى لرفع دعوى خلع من زوجها بعد عام ونصف فقط من الزواج مبررة ذلك بقولها 'اكتشفت بعد الجواز أن حياته مليانة بالسهر والشرب وكان مخبي عليا قبل الزواج، لحد ما اتجوزنا وبقي كل ليلة يسهر مع الراقصات فى شارع الهرم، حتى علاقات فى الحرام بيعمل على الرغم انى مهتمة بنفسي وبيتى، وصبرت كتير عليه عشان يبطل الشرب والستات، لكن مفيش فايدة، حاله مش راضى يتصلح'.
محمد في دعوى نشوز: "هربت مع عشيقها في نص الليل بفلوسي وسابت ابنها"
تقدم بدعوى قضائية أمام محكمة الأسرة لرفع دعوى نشوز ضد زوجته بعد 3 سنوات من الزواج مبررا ذلك بقوله: 'عرفت تخدعنى صح 3 سنين عيشتني مغفل وهى ليها عشيق من قبل الزواج واستغلت وجود فلوس الشغل فى البيت واخدت 50 ألف جنيه وهربت مع عشيقها في نص الليل صحيت ملقيتهاش جنبي ولا لقيت الفلوس وأهلها ميعرفوش عنها حاجة، بس نسيت تليفونها ولقيت عليه كل رسايل خيانتها، منها لله شوهت سمعتي وشرفي قدام أهل المنطقة، مبقتش قادر ارفع عيني في حد، وكمان هان عليها وسابت ابنها اللى عنده سنتين'.
منى في دعوى خلع: "كان بينادي عليا باسم عشيقته"
'كان بينادى عليا باسم عشيقته، 8 سنين جواز مستحملة خيانة وسهر وشرب وقرف وضرب ، كنت بصحى بالليل أسمعه بيعمل معها علاقة جنسية فى التليفون ولما كلمته ضربنى، ويهددنى انه هيجيبها البيت كنت خايفة فى البداية أطلق عشان ولادى لكن خلاص بعد ما ابنى سمعه بالليل بيتكلم مبقتش فارقة'.. نطقت بهذه الكلمات منى وهى داخل محكمة الأسرة لرفع دعوى خلع من زوجها بعد ثمانى سنوات من الزواج مبررة ذلك باستحالة العشرة معه.
أحمد في دعوى نشوز: "بتعلي صوتها عليا وكل شوية تهددني بالقايمة"
تقدم أحمد، بدعوى قضائية أمام محكمة الأسرة لرفع دعوى نشوز ضد زوجته بعد عامين ونصف من الزواج، مبررا ذلك بقوله ' عصبية وبتعلي صوتها عليا لدرجة الجيران بيسمعوها وهى بتصرخ وتتكلم، حتى مع أبنها الرضيع متعرفش تتكلم بهدوء كل حاجة فى حياتها صعبة، بتغضب كل شهر مرة وتهددنى بالقايمة وانها هتلففني كعب داير فى المحاكم'.
سمر في دعوى إثبات نسب " طلقني وأتجوزني عرفي عشان معاش ولدي"
بعد ما طلقني واتجوزنى عرفي عشان ناخد معاش والدي حَملت ولما خلفت رفض يسجل المولود وسابنى ومشى معرفش طريق ليه، ابنى مش عارفة اسجل فى سجلات المواليد '، بعض هذه الكلمات نطقت بها سمر وهى داخل محكمة الأسرة بزنانيرى دعوى إثبات نسب صغيرها بعد أن طلقها زوجها وتزوجها مرة أخرى عرفيا ورفض أن يسجل أبنه الصغير وتركها لم تعرف له مكان.
تابعوا آخر أهل مصر على Google News
