شهد تطلب الخلع: "اتغير معايا بسبب حب الناس ليا وإعجابهم بشخصيتي"

'بشهادة أهله ومعظم الناس أنى جوهرة وكتير على جوزى والحمدلله بهتم بالبيت وبكل متطلباته، لكن هو ديما بيسد نفسي بكلامه التقيل على قلبي وأنى قليلة ومش شايف فيا أى حاجة حلوة، ينتقدنى طول الوقت، أنى مهملة ومش حلوة، لحد ما بقيت أفكر فى أى شخص يقول لى كلمه حلوة من أقاربي حتى لو مجاملة عشان بقيت محرومة من الكلام الرومانسي أو اللى يجبر الخاطر'.. نطقت بهذه الكلمات شهد وهى داخل محكمة الأسرة لرفع دعوى خلع من زوجها مبررة استحالة العشرة معه بعد عامين ونصف من الزواج.

روت الزوجة قصتها لـ'أهل مصر'، موضحة أنها تزوجت منذ عامين ونصف من شخص كان يعمل فى إحدى الشركات وعلى صلة قرابة بها، قائلة: 'هو يقرب لوالدتى من بعيد، وتقدم عشان يخطبنى بعد ما والده اقترح عليه، ولما شافنى عجبته، والكل بيشهد انى على قدر من الجمال، الحمدلله والعرسان كانوا بيطلبوني كتير، لكن النصيب أنى ارتحت للشخص دا، واتخطبنا 7 شهور، كان كويس معايا وبنتكلم عادى، لكن لاحظت أنه بيحب يثبت أنه صح فى كل حاجة'.

وتابعت حديثها: 'عرفت فى البداية أنى اتعامل معاه، لكن شكر الناس فيا وفى شكلى وأخلاقى بعد الزواج خلاه بقى يشوف نفسه عليا أكتر ويقلل من كل حاجة فيا، شكلى لبسى حتى أخلاقى، لو كوباية على السفرة أتاخرت فى شيلها يفضل يقول لى انتى مهملة وست فاشلة، بقيت أحس انى قليلة وأحس بالنقص دايما من معاملته ليا، وطريقته معايا، عشان كدا طلبت منه الطلاق لحد ما حسيت بالحرمان ولكن أهله رفضوا أنه يطلقنى، روحت محكمة الأسرة لرفع دعوى خلع وأنتظر أولى الجلسات'.