تقدمت وفاء بدعوى قضائية أمام محكمة الأسرة لرفع دعوى خلع من زوجها بعد ٣ سنوات من الزواج مبررة ذلك بقولها: 'إنسان عديم المشاعر، ميعرفش يتعامل ازاى مع واحدة ست، ولا يحس بيها، طول الوقت مافيش حاجة شغالة دماغه غير الأكل، وعايز كل الناس اللى حواليه زيه يشاركوه في اهتمامه بالأكل، لحد ما حسيت انى عايشة مع شخص لا يطاق حتى العلاقة الزوجية لو مكنتش أنا اللى اشجعه وأطلب منه ولا يقرب منى، والحمد لله ربنا مكرمنيش بخلفة، عشان اقدر أطلق منه وأعوض السنين اللى عشتها معاه'.
وروت وفاء قصتها لـ'أهل مصر' موضحة أنها تزوجت منذ ٣ سنوات، من موظف بإحدى الشركات، وتم الزواج عن طريق المعارف قائلة: لما اتقدم ليا كل الناس شكرت في أخلاقه، وقالوا أنه إنسان طيب وكويس وبصراحة هو فعلا كدا، بس نسيوا يقولوا أنه مفجوع ومش بيتهم غير بالأكل فى حياته، طلباته فى الأكل مش بتخلص، ودا مكنش هيبقي مشكلة لو بيحبنى زى الاكل أو حتى يحسسنى بكيانى، أو اسمع منه كلمه حلوة، لكن هو مكنش بيعرف يعمل أى حاجة ولا يقول كلام رومانسي حتى العلاقة ديما أنا اللى ابدأ.
وتابعت حديثها: حاولت معاه كتير أنه يتغير، طلبت منه أنه يهتم بيا مش كل الكلام بيننا على الأكل وبس، لكن هو مافيش فايدة، حتى تأخرنا فى الخلفة مكنش فى باله، كنت انا اللى بسأل واكشف عند الدكتور وهو لا مبالاة، لدرجة أنه ممكن يكلمنى وأنا عند الدكتور عشان عايز محشي، ومفكرش يسأل عليا، وطلبت الطلاق ولكنه رفض عشان كدا رفعت دعوى خلع، ومازالت الدعوى منظورة أمام القضاء.
تابعوا آخر أهل مصر على Google News
