صفاء من داخل محكمة الأسرة: "زوجي بخيل ولو الفاكهة خلصت بيتخانق معايا"

تقف صفاء داخل محكمة الأسرة بعد 11 شهرا من الزواج؛ لرفع دعوى خلع من زوجها مبررة ذلك بقولها: "بخيل جدا فى الفلوس والأكل والشرب، دايما يحاسبنى على أقل حاجة، لو اشترى فاكهة وخلصت يفضل يتخانق، لدرجة إنى لو زرت اهلي وطلبت منه أشترى فاكهة أو حلويات يرفض ويقول لى "دا مش واجب عليكى"، بقيت بحس بالنقص قدام الناس، إنى مش بقدم أى هدايا لحد، كمان حتى الشغل رفض إنى أنزل، طلبت منه إنى أروح لدكتور عشان أشوف موضوع الحمل اتأخر ليه، يقول لي" لسه بدرى انتى عايزة تصرفي وخلاص".

وروت الزوجة قصتها لـ"أهل مصر": "تزوجت منذ 11 شهرا، بعد فترة خطوبة ٤ شهور، لاحظت خلالها بخله ولكن الجميع كان يقنعها أنه ليس بخل، بل يريد أن يجهز شقته ويوفر من أجل ذلك إلى درجة أنه لم يأتي لها بهدية أو زيارة خلال الأربع أشهر، وتغاضت عن ذلك واستمعت إلى الأحاديث العائلية التي تؤكد أنه ليس بخيلا، وأنه يسعى من أجل المستقبل، قائلة: "كنت حاسة أنه بخيل، وبعد الزواج اتاكدت من كدا، إنسان بشع بكل المقاييس، بيعد عليا الأكل والشرب، ممنوع أمسك فلوس فى إيدي أو أشتري أي حاجة شخصية".

وتابعت حديثها قائلة: "كنت بحس بالإحراج الشديد لما أدخل أزور أهلي وأنا إيدى فاضية أو أزور حد من أهله، كان يمنعنى آخد أى حاجة معايا، لدرجة إنه منعني أكشف عشان أشوف الحمل اتأخر ليه، وكل شوية يقول لى انتى مبذرة ومسرفة، وأنا راجل مرتبي على القد، على الرغم إن حالته المادية ميسورة وبيشتغل طول اليوم، معرفش مرتبه كام، وموضوع الكشف ورفضه كانت القشة التى قسمت ظهر البعير وطلبت الطلاق ورفض إنه يطلقنى عشان ماخدوش حقوقي، عشان كدا رفعت دعوى خلع بمحكمة الأسرة وانتظر أولى الجلسات".