ياسمين في دعوى خلع: "رفع عليا المطوة واتهمني بالخيانة"

"من أول ما اتخطبنا وهو دايما يسألني عن أدق التفاصيل حتى الخروج بمواعيد، وأنا فى بيت أهلي، ممنوع أنى أكلم أو أصاحب بنت غير لما يقبل هو، وكنت مخنوقة بتصرفاته فى فترة الخطوبة، وكنت هنفصل عنه، لكن أهلى وصاحباتى أقنعنونى أنه كدا فى الخطوبة كل الرجالة، وبعد الجواز مش هيبقي مهتم بحاجة".

وتابعت ياسمين وهى داخل محكمة الأسرة لرفع دعوى خلع من زوجها بعد عام واحد فقط من الزواج: "أنا صدقتهم واكتشفت إنى كنت بكذب نفسي، وهو مريض بالشك والأوهام ودا اللى اكتشفته بعد الجواز، لحد ما اتجرأ ورفع عليا مطوة وجرحنى فى إيدى".

وروت الزوجة قصتها لـ"أهل مصر": "هو قريب واحدة صحبتى وشافنى معاها، وطلب إنه يتقدم عشان يخطبني، وهو موظف ومن أسرة محترمة، لكن بعد الخطوبة لقيته بيطالبنى يعرف كل حاجة عنى خروجات فسح كلامى لزمايلي، ودا شئ كان خنقنى جدا وفكرت إنى أفسخ الخطوبة، لكن كل اللى حواليا كان بيقولوا إنه عادى وبعد الجواز هيتغير، لكن للأسف اكتشفت إنه مريض نفسي بيعانى من الشك والتهيؤات، وكنت أفتكر أن حالته بسيطة لكن دى صعبة أوى فى الحقيقة".

وواصلت "كنت عايشة فى جحيم بسببه، وكنت بقول أتحمل وأيام وهتعدى، حتى بدأ يتهمنى بالخيانة، وفى يوم اتطور الأمر وأصر إنى خنته، رغم يعلم ربنا إنى محافظة على بيته وعرضه، وفجأة رفع عليا مطوة وهددنى بيها، وفى أقل من ثانية كان بيحاول يقتلنى وعرفت أهرب منه، وقررت إنى أطلق عشان كدا رفعت دعوى خلع بمحكمة الأسرة وأنتظر أولى الجلسات".