ضحى فى دعوى خلع: "بعلمه الأدب عشان مد إيده عليا"

تقدمت ضحى بدعوى قضائية أمام محكمة الأسرة لرفع دعوى خلع من زوجها بعد عام ونصف من الزواج مبررة ذلك بقولها: 'أول مرة فى خناقة بيننا يتطاول ويمد إيده عليا ويضربنى بالقلم، وبمجرد ما قال آسف عايزنى أسامحه، استحالة لازم أعلمه الأدب ويفهم ان الرجولة مش بمد الإيد وقلة الأدب، عشان كدا قررت أرفع عليه دعوى خلع، على الرغم انى لما عرف انى رافعه عليه دعوى خلع باس على دماغى وإيدى عشان اتنازل وأنا رفضت'.

وقالت الزوجة في مستهل حديثها مع أهل مصر: 'اتجوزت بعد ٧ شهور من الخطوبة، وكان بيحبنى جدا واتفقت معاه على الاحترام بينا أكتر من الحب وتكون المعاملة بما يرضي الله لكن هو مش راعى كدا، الأول بدأ يتطاول بالكلام بعد الجواز ولما اضايقت واتخانقت معاه، كان يعتذر وكنت بسامحه، لكن هو افتكر مسامحتى ليه ضعف وقلة حيلة منى، لما فى خناقة مد إيده عليا وضربنى بالقلم، القلم منكرش كان سهل لكن كرامتى وجعتنى أوى وبقيت حاسة انه مسيره يعمل أكتر من كدا، وسبت له البيت وروحت بيت أهلى، وجه اعتذر لكن رفضت أقابله.

وتابعت حديثها قائلة: حاول كتير لكن أنا قررت أرد القلم اللى ضربه ليا وارفع دعوى خلع منه، عشان يشوف منظره قدام الناس وهو مخلوع، وفعلا روحت محكمة الأسرة ورفعت دعوى خلع ومازالت الدعوى منظورة أمام القضاء.